Almatyda memlekettik qyzmetkerler úshin uıymdastyrylǵan semınarda kásipodaqtar qyzmetin reformalaý aıasynda ázirlengen «Jol kartasynyń» tanystyrylymy ótti. Qujatta áleýmettik ádilettilik pen seriktestik prınsıpterin damytý, áleýmettik-eńbek qatynastaryn jaqsartý, kásipodaqtardy nyǵaıtý jáne biriktirý jóninde erejeler sıpattalǵan.
Almaty kásipodaqtary uıymy osylaısha, birqatar qol qoıylǵan memorandýmdardyń arqasynda, megapolıs azamattarynyń laıyqty eńbek etý quqyǵyn, qyzmetkerler men olardyń otbasy músheleriniń ómir sapasyn arttyrýdy, jalaqyny, zeınetkerlik jáne áleýmettik tólemderdi ýaqytyly jasaýdy, bıznesti damytýdy, turaqty jumysbastylyqqa qol jetkizýdi, eńbek naryǵynyń ıkemdiligin, salaýatty qaýipsiz jaǵdaı qalyptastyrýdy qamtamasyz etetin áleýmettik-ekonomıkalyq saıasatty júrgizýdi maqsat etedi.
«Ujymdyq sharttardyń erejelerinde áleýmettik shıelenisti tómendetý týraly, jumyskerlerdiń quqyqtary men múddelerin qorǵaýdyń qosymsha kepildikteri jóninde sharalar belgilengen. Sondaı-aq, Ujymdyq sharttarǵa salaýatty jáne qaýipsiz eńbek pen turmys jaǵdaılaryn uıymdastyrý, eńbekti qorǵaý jáne qaýipsizdik jónindegi sharalardy qarjylandyrý kólemi, densaýlyq qorǵaýdy jaqsartý týraly erejeler de engizilgen. Sondyqtan da kásipodaqtar qabyldanǵan ujymdyq sharttardyń sanyn kóbeıtý men sapasyn arttyrý aıasynda júıeli jumys júrgizip keledi», — dedi óz sózinde «Almaty qalasynyń Kásipodaq ortalyǵy» aýmaqtyq kásipodaqtar birlestiginiń tóraǵasy Záýresh Ómirbaeva.
Tóraǵa búgingi kúni ujymdyq sharttarmen qamtylý deńgeıi Qazaqstan boıynsha bar joǵy 34 paıyz ekendigine toqtaldy. Endigi jerde áleýmettik-eńbek qatynastarynyń zamanaýı sıpaty men álemdik talaptarǵa saı keletin áleýmettik jáne eńbek sharttarynyń jańa formalary daıyndalýda. Áleýmettik-óndiristik prosesterdegi ujymdyq sharttardyń orny men sapasyn, rólin arttyrý — kásipodaqtar jumysynyń basty aspektisi bolyp qala beredi.
Kásipodaqtar áleýmettik seriktestik aıasynda jumys berýshilermen jumys oryndaryn saqtaý máselesin de basty nazarda ustap otyr. Qazirgi kezde Qazaqstanda jumys oryndaryn saqtaý týraly, elimiz boıynsha 2,8 mıllıon jumyskerlerdi qamtıtyn 115 myńnan astam memorandýmdarǵa qol qoıylǵan.
«QAÝİPSİZ EŃBEK» BAǴDARLAMASY
Bul rette qalanyń kásiporyndary men uıymdarynda eńbek qaýipsizdigin qamtamasyz etýge aıryqsha kóńil bólinip otyr. Kásibı aýrýdy, óndiristik jaraqat alyp qalý deńgeıin tómendetýge, óndiriste adam ólimine ákeletin qaıǵyly jaǵdaılardy boldyrmaýǵa jáne eńbek qaýipsizdigin jaqsartýǵa, ómir uzaqtyǵyn ulǵaıtýǵa, turǵyndardyń densaýlyǵyn saqtaýǵa baǵyttalǵan «Qaýipsiz eńbek» baǵdarlamasy bekitilgenin aıtqan Z.Ómirbaeva Óndiristik keńesterdiń mańyzdylyǵyn da atap ótti:
«Jyl saıyn bir jarym myńnan astam adam óndiriste jaraqat alady, júzdegen adamdar qaıtys bolady. Osy maqsatta eńbekti qorǵaý men eńbek qaýipsizdigi jónindegi Óndiristik keńes qurý týraly jumys júrgizilýde. QR Eńbek Kodeksinde Óndiristik keńes týraly arnaıy ereje bar ekenin eske sala ketkim keledi. Kásipodaǵy bar barlyq uıymdarda Óndiristik keńester qurylǵan. Keńes eńbekti qorǵaý talaptaryn qamtamasyz etý, óndiristik jaraqat alýdan, kásibı aýrýlarǵa ushyraýdan saqtandyrý, eskertý baǵytynda jumys isteıdi, tehnıkaldyq ınspektorlar arqyly jumys oryndarynda eńbek qaýipsizdigi talaptarynyń saqtalýyn tekserýdi uıymdastyrady».
Kásiporyndarda jaraqat alý deńgeıin tómendetý maqsatynda QR Kásipodaqtar federasıasy 2018 jyldy «Qaýipsizdik jáne eńbekti qorǵaý jyly» dep málimdedi. Bul bastama qaýipsizdik pen eńbekti qorǵaý salasynda eńbek zańdylyǵyn saqtaýǵa qoǵamdyq baqylaýdy kúsheıtý maqsatyn kózdeıdi.
Sonymen birge, Kásipodaq ortalyǵy áleýmettik seriktesterimen birlese otyryp, «Ónimdi jumyspen qamtý men jappaı kásipkerlikti» damytý baǵdarlamasyn júzege asyrýǵa arnalǵan sharalar uıymdastyrýda. Bul baǵdardyń maqsaty — ónimdi jumyspen qamtylý jobasyna yqpal etý, turǵyndardy kásipkerlikke tartý, tıisti, qajetti jaǵdaı týǵyza otyryp, ózin-ózi jumyspen qamtyǵan azamattarǵa, jumyssyzdarǵa kiristerin kóbeıtýge kómektesý.
«EŃBEK SHARTYN JASAŃYZ» AKSIASY
2018 jyldyń naýryzynan bastap 2019 jyldyń jeltoqsanyna deıin «Eńbek shartyn jasańyz» atty respýblıkalyq aksıa ótýde. Aksıanyń maqsaty – jasyryn jasalatyn ári zańsyz eńbek qatynastaryn boldyrmaý, aıǵaqtaý, «qupıa sharttardy» qysqartý, azamattardyń eńbek etý salasyndaǵy óz quqyqtary týraly saýatyn ashý.
Almaty kásipodaq ortalyǵynda «senim telefony» jumys isteıdi, «Mega», «Promenad», №12 qalalyq klınıkalyq aýrýhana, №21 emhana, Almaly aýdandyq zeınetaqy tóleý ortalyǵy» jáne taǵy basqa da birqatar halyq kóp jınalatyn jerlerge «Senim jáshikteri» ornalastyrylǵan. QR Kásipodaq federasıasynyń bazasynda kúndelikti 9.00—18.00 aralyǵynda Qoǵamdyq qabyldaý uıymdastyrylyp, túsindirý jumystary júrgiziledi. Sondaı-aq, «Nur Otan» partıasynyń Qoǵamdyq qabyldaýy ár aıdyń alǵashqy seısenbisinde, 15.00—17.00 aralyǵynda osy máseleler boıynsha azamattardy qabyldaıdy.
«Kóptegen kásiporyndarda kelisim komısıalary qurylmaǵan. Jeke daý-damaıdy sheshýge durys kóńil bólinbegen, mán berilmegen jaǵdaıda ol ujymdyq narazylyqqa ulasyp, úlken eńbek shıelenisine ákelip soǵýy ábden múmkin. Mine, osy turǵyda, kelisim komısıalaryn qurýda, jumyskerlerdiń quqyǵyn qorǵaý men saqtaýda, keıde jaǵdaı ýshyǵyp ketkende ekijaqty ymyraǵa keltirý máselesinde kásipodaqtardyń róli zor bolmaq», — degen túsinik berdi spıker. Onyń aıtýynsha, shıelenisterdi sotqa deıin sheshý maqsatynda arnaıy «Tatýlasý ortalyǵy» qurylǵan. Onda kásipodaqtar, Almaty qalasynyń medıatorlary, Halyqaralyq quqyq qorǵaý ortalyǵynyń, Medıasıany damytý ortalyǵynyń mamandary, «Kásibı medıatorlar» qoǵamdyq birlestiginiń ókilderi, qaladaǵy basqa da medıatorlar jumys isteıdi. Joba daýly, shıelenisti máselelerdi sot jáne quqyq qorǵaý organdaryn aralastyrmaı-aq, bir alańda jolyǵý arqyly ózara kelisimmen sheshýge baǵyttalǵan azamattyq qoǵamdaǵy qarym-qatynastyń jańa pálsapasyn qalyptastyrady. Azamattarǵa medıator, advokat, sot oryndaýshysy, notarıýs, psıholog jáne ákimdiktiń áleýmettik sala mamandarynyń qyzmeti bir alańda kórsetiledi.
Almaty kásipodaǵy jumysynyń taǵy bir baǵyty – jastarmen jumys. Jastardy kásipodaq qataryna jumyldyra otyryp, olarǵa jumysqa ornalasýyna, talabyna, bilimi men biligine saı laıyqty jalaqysy bar jumysqa turýyna, jaqsy bilim men sapaly dárigerlik kómek alýyna, mazmundy da taǵylymdy demalysyn uıymdastyrýǵa kómek beredi.
