Kıe tunǵan jerlerdi qasterleý - búgingi urpaqtyń paryzy. Elbasy Nursultan Nazarbaev «Bolashaqqa baǵdar: rýhanı jańǵyrý» atty baǵdarlamalyq maqalasynda jalpyulttyq qasıetti oryndar uǵymynyń erekshe mańyzdylyǵyn atap ótken bolatyn. «Qazaqstannyń qasıetti jerleriniń mádenı-geografıalyq beldeýi – neshe ǵasyr ótse de, bizdi kez-kelgen rýhanı jutańdyqtan saqtap, aman alyp shyǵatyn sımvoldyq qalqanymyz, ári ulttyq maqtanyshymyzdyń qaınar bulaǵy. Ol – ulttyq biregeılik negizderiniń basty elementteriniń biri» – dep atap ótti Memleket basshysy.

Elbasynyń osy baǵdarlamalyq maqalasy aıasynda uly kúıshi Qurmanǵazy Saǵyrbaıulynyń 195 jyldyǵy jáne Qurmanǵazy aýdanymyzdyń 90 jyldyq mereıtoıyna oraı aǵymdaǵy jyldyń 20 shilde kúni Atyraý oblysy Qazaqstan Halqy Assambleıasy, Atyraý oblysy ákimi apparatynyń "Qoǵamdyq kelisim" KMM-si men Qurmanǵazy aýdandyq analar keńesiniń uıymdastyrýymen Reseı Federasıasynyń Astrahan oblysy, Volodar aýdany, Altynjar selosyndaǵy kúı atasy Qurmanǵazy babamyzdyń máńgi tynystap jatyrǵan mekenine Qurmanǵazy aýdanynan bir top delegat saıahat jasady.

Sapardyń maqsaty: Elbasynyń «Rýhanı jańǵyrý» baǵdarlamasy aıasynda Qazaqstan tarıhyn bilýge jáne qurmetteýge shaqyrý, tarıhı-mádenı qundylyqtarymyzdy saqtap qalý, olardy urpaqtan-urpaqqa jetkizý.

Delegat quramyna Qurmanǵazy aýdanynyń «Altyn shańyraq» analar keńesiniń músheleri, eńbek ardagerleri men olardyń laıyqty izin jalǵastyrǵan búgingi jas býyn ókilderi qatysty.

Qazaq elinen barǵan bir top jerlesterimiz saıahat barysynda Qurmanǵazy atyndaǵy kesenesiniń turǵyzylý tarıhymen tanysty. Sonymen qatar, delegat músheleri Qurmanǵazy atyndaǵy mádenı ortalyǵynda bolyp qaıtyp, murajaı jádigerlerimen tanysyp, kúı atasy Qurmanǵazynyń ómirderekteriniń beımálim tustarynan da habardar boldy. Saıahat kúıshiniń atyndaǵy mádenı ortalyǵyndaǵy konsertpen jalǵasty.

Qurmanǵazy atyndaǵy mádenı ortalyq - Reseı-Qazaqstan dostyǵynyń aıryqsha belgisi. Osydan on jyldan astam ýaqyt buryn Qazaqstannyń Atyraý, Batys Qazaqstan, Mańǵystaý oblystary men Reseıdiń Astrahan oblysy birlesip salǵan bul keshendi oryn, qazaq mádenıetiniń oshaǵyna jáne Edil boıy men Kaspıı óńiriniń mádenı murasyn zerttep, nasıhattaý ortalyǵyna aınaldy. Bul ortalyqtyń bazasynda bolyp júrgen barlyq mádenı ótilimder dástúrli qazaq ultynyń qundylyqtaryn, ónerlerin nasıhattaýǵa jáne damytýǵa baǵyttalǵan.

Mádenı ortalyqtyń qyzmetkerleri Altyn Mýsaeva men Zalına Iskalıeva eki el arasyndaǵy yntymaqtastyqtyń, áriptestiktiń áli de nyǵaıa beretinine, budan da joǵary bıikterge kóteriletinine zor senimderin bildirip, Qazaqstannyń jetistikterine qýanyp, maqtanatynyn úlken tebirenispen jetkizip jatty. Óz kezeginde Qurmanǵazy aýdandyq analar keńesiniń tóraıymy Balǵanym Hasenova rýhanı azyq syılaǵan mádenı qyzmetkerlerge shyǵarmashylyq tabys tilep, estelik retinde ulttyq ensıklopedıa kitaptaryn syıǵa tartty.