Bul sýretti 1945 jyly Japonıada amerıkalyq fototilshi Djo O^Donnel túsirgen. Sýrettiń maǵynasy tereń, aıtary kóp. Fototilshi muny bylaı sýrettedi:

«Men on jas shamasyndaǵy balany kórdim. Arqasyna sábı arqalap alǵan.

Ol kúnderi Japonıada ini-qaryndastaryn arqalap oınap júrgen talaı balany kórdim. Alaıda bul balanyń jaǵdaıy bólek edi. Sábıdi arqalap alýynyń naqty bir sebebi baryn túsindim.

Aıaǵynda aıaq kıimi joq. Júzi qatal. Al sábıdiń basy terbelip keledi, uıyqtap jatqan shyǵar dep oıladym. Balaqaı dittegen ornyna kelip 5 nemese 10 mınýt únsiz turdy.

Keıin aq betperde kıgen adamdar balaǵa jaqyndap jibin sheshe bastady. Sóıtip sábıdi jalyndap turǵan ottyń ústine qoıdy.

Bala otqa qarap únsiz tur. Astyńǵy ernin qatty tistep alǵany sonsha qanap ketti. Biraz turǵan soń buryldy da, typ-tynysh kete bardy».

AQSH 1945 jyly 9 tamyzda Nagasakı qalasyna atom bombasyn tastaǵan. Sonyń saldarynan 140 myńǵa jýyq adam ajal qushty. Tiri qalǵandary aýyr dertke shaldyqty. Ólgen adamdardyń deneleri buzylyp, teri aýrýlaryna ulaspas úshin ashyq peshterde órteldi. Al sheshesi qaıtys bolǵan sýrettegi balanyń kishkentaı baýyry da jarylystyń kesirinen kóz jumdy. İnisin órteý peshine óz qolymen ákelip otyr. Ol ýaqytta ózge deneler órtelip jatqan edi. Balaqaı otandastaryn aqtyq saparǵa tik turyp shyǵaryp saldy. Tipti kózine bir túıir jas ta almady.