Abel Sanches qazaqstandyq boksshy WBA "turaqty" chempıony jáne WBO chempıony belbeýleri úshin judyryqtasýy múmkin ekenin aıtty dep jazady Qamshy.kz aqparat agenttigi Sports.kz saıtynyń deregin negizge alyp. 

Gennadıı Golovkınniń bapkeri (38-1-1, 34 KO) Abel Sanches orta salmaqtaǵy álem chempıony tıtýly úshin ótetin eki jekpe-jekke túsinikteme berdi.

Áńgime WBA "turaqty" chempıony Rıota Mýratamen (14-1, 11 KO) ótkizilýi múmkin jekpe-jek pen Bıllı Djo Sonders (26-0, 12 KO) dopıng-testen súrinýine baılanysty belbeýinen aıyrylyp qalǵan jaǵdaıda, bos qalǵan WBO tıtýly úshin uıymdastyrylatyn aıqas jaıly bolyp otyr. 

"Mýrata deısiz be? Onymen kezdesýimiz múmkin. Buǵan deıin onyń promoýteri Akıhıko Hondanyń ózi bul máseleni kótergen edi. Ol bul jekpe-jek unaıtynyn aıtty. Sondyqtan bári de múmkin. Sonymen qatar dopıng-testen súringen Sonderstiń belbeýine de kóz tigip otyrmyz – eger onyń belbeýin qaıtaryp alsa, biz bos qalǵan tıtýl úshin judyryqtasatyn shyǵarmyz, kim bilsin", — dedi Sanches. 

Aıta keteıik, Dúnıejúzilik boks keńesiniń (WBC) basshysy Maýrısıo Sýleıman sondaı-aq Golovkınniń meksıkalyq Saýl Alvarespen úshinshi jekpe-jegi ótýi múmkin ekenin málimdegen bolatyn. Onyń pikirinshe, Golovkınniń revansh ótkizý jaıly usynysy eskerýsiz qalmaýy kerek.

"Kanelo" belbeýin qorǵaýǵa mindettelýi múmkin, alaıda óz erkimen qorǵaıtyn joldary da bar. Sondaı-aq biz Golovkın revansh suraǵanyn bilemiz. Ázirge bul jekpe-jek resmı jarıalanǵan joq, alaıda ol ony ótkizgisi keletinin jetkizdi", — dep atap ótti Sýleıman.