«QAZSPORT» telearnasy 2018 jyldyń 7 qazanynda Las-Vegasta (AQSH) UFC 229 týrnıri aıasynda reseılik Habıb Nurmaǵamedov pen ırlandıalyq Konor MakGregor arasynda ótetin jekpe-jekti tikeleı efırde kórsetedi. Translásıa Astana ýaqytymen 07:50-de bastalady.
Jeńil salmaqtaǵy UFC chempıony Habıb Nurmaǵamedov aralas jekpe-jekte 26 kezdesý ótkizip, barlyǵynda jeńiske jetken. Onyń segizin nokaýtpen aıaqtaǵan. Sońǵy jekpe-jegin 2018 jyldyń 7 sáýirinde El Iakvıntaǵa qarsy ótkizip, amerıkalyq qarsylasyn tóreshilerdiń sheshimi boıynsha jeńgen bolatyn. Sóıtip, jeńil salmaqtaǵy UFC chempıony atandy.
Irlandıalyq Konor Makgregor 2015-2018 jyldar aralyǵynda qarsylas shaq keltirmeı, jeńil salmaqtaǵy UFC chempıony bolyp keldi. Otyz jastaǵy sportshy 24 jekpe-jek ótkizip, 21-de jeńiske jetken, 18-in nokaýtpen aıaqtaǵan. Úsh jeńilistiń ekeýine Konor oktagonǵa jańa ǵana shyǵyp júrgen kezinde ushyryǵan. Úshinshi ret 2016 jyldyń 5 naýryzynda amerıkalyq Neıt Dıastpen ótken kezdesýde jeńilgen bolatyn. Biraq, araǵa birneshe aı salyp, Makgregor Dıaspen qaıta júzdesip, esesin qaıtardy. UFC aıasyndaǵy sońǵy jekpe-jegin Konor 2016 jyldyń 12 qarashasynda ótkizip, amerıkalyq Eddı Alvaresti tehnıkalyq nokaýtpen jeńdi. Ótken jyly Makgregor kásipqoı bokstyń erejesi boıynsha amerıkalyq Floıd Meıvezermen qolǵap túıistirdi. Kezdesý onynshy raýndta toqtatylyp, tóreshiler tehnıkalyq nokaýtpen Meıvezer jeńiske jetti degen sheshim qabyldady.
Esterińizge sala ketsek, «Qazaqstan» teleradıokorporasıasy UFC aıasyndaǵy jekpe-jekterdi Qazaqstan aýmaǵynda bir jarym jyl boıy kórsetý quqyǵyna ıe boldy. 2018 jyldyń qyrkúıek pen jeltoqsan aılary aralyǵynda «QAZAQSTAN» jáne «QAZSPORT» telearnalarynda UFC-diń 14 jekpe-jek keshi efırge shyǵady. Al, 2019 jyldan bastap 40-tan astam týrnırdiń kórsetilimi josparlanǵan.
Habıb Nurmaǵamedov pen Konor Makgregor arasyndaǵy jekpe-jekti 7 qazan kúni 07:50-de «QAZSPORT» telearnasynan jáne «QAZAQSTAN TV» mobıldi qosymshasy arqyly da kóre alasyzdar!
