«7-20-25» baǵdarlamasy aıasynda 27 mıllıard teńgege ótinish qabyldanǵan. Bul týraly Ortalyq komýnıkasıalar qyzmeti uıymdastyrǵan baspasóz máslıhaty barysynda «Baspana» Ipotekalyq uıymynyń» basqarma tóraǵasy Qaırat Altynbekov málimdedi, dep habarlaıdy Qamshy.kz aqparat agenttigi.
«2018 jyldyń 11 qyrkúıegindegi kórsetkishine sáıkes, «7-20-25» baǵdarlamasy aıasynda 27 mıllıard teńge qarajat kóleminde ótinish qabyldanǵan. 18 mıllıard teńgelik ótinish bank tarapynan maquldanǵan. Maquldanǵan nesıelerdiń tamyzdaǵy kórsetkishi shildege qaraǵanda eki esege ósken», - dep habarlady Qaırat Altynbekov.
Sonymen qatar uıym basshysy jańa baǵdarlamaǵa belsendi qatysyp jatqan óńirlerdi atady. Aıtýynsha, Almaty, Astana qalalary men Mańǵystaý oblysy «7-20-25» boıynsha kósh bastap tur. Aqtóbe, Shyǵys-Qazaqstan jáne Aqmola oblystary da nesıe ósiminde alda kele jatyr. Al Soltústik Qazaqstan jáne Túrkistan oblystarynyń turǵyndary arasynda belsendilik baıqamaıdy. Munyń sebebin Altynbekov atalmysh óńirlerde jeke qurylys kompanıalardyń azdyǵymen túsindirdi.
Buǵan qosa Qaırat Altynbekov qyrkúıek aıynyń eń joǵary kórsetkish kórsetkenin málimdedi.
«Máselen, eger «Nurly jer» baǵdarlamasy búkil tarıhynda 37 mıllıard teńge kóleminde bolatyn nesıeleý prosesin oryndasa, «7-20-25» nebári eki aıdyń ishinde bul kórsetkishtiń jartysynan asyp tústi. Menińshe, baǵdarlama óte tıimdi, ári kósh bastap tur», - dedi Qaırat Altynbekov.
Baǵdarlamaǵa qatysty turǵyndar qyzyǵýshylyq tanytyp otyr. «Baspana» basshysynyń málimdeýinshe klıenttermen eshqandaı qıyndyqtar týmaıdy.
«Aıtarym, turǵyndar arasynda da qyzyǵýshylyq artqan. Bank-seriktesterimizge suraý salyp, bilgisi keletin jandardyń sany kún sanap artyp keledi. Alaıda baǵdarlamanyń basty talaptary bárine málim. Alǵashqy jarna 20 paıyz, jyldyq mólsherleme 7 paıyz, nesıeniń eń uzaq merzimi 25 jylǵa deıin», - dep túsindirdi «Baspana» Ipotekalyq uıymynyń» basqarma tóraǵasy Qaırat Altynbekov.
Ári «Baspana» basshysy «7-20-25» baǵdarlamasyna belsendi qatysyp júrgen klıentterdiń qandaı bolatynyn da sıpattap berdi. Aıtýynsha, kóbine 24-40 jas aralyǵyndaǵy azamattar keledi. Tabystary turaqty.
«7-20-25» baǵdarlamasy 4 shildeden bastap resmı túrde jumysqa kiristi. Buǵan deıin QR Ulttyq banki baǵdarlamaǵa qatysatyn seriktes bankterdi ataǵan.
Tizimge 7 bank endi. Olar: Bank Sentrkredıt, Evrazıa banki, ATF bank, Halyq banki, bank RBK, Sesnabank, Turǵyn úı qurylys jınaq banki.
Jýyrda Sberbank pen Forte bank qosyldy.
Aıta keteıik, «7-20-25» baǵdarlamasy QR prezıdenti Nursultan Nazarbaevtyń 5 naýryzda jarıalaǵan «Bes áleýmettik bastamasyn» júzege asyrý aıasynda jasaldy. Baǵdarlama boıynsha ıpotekalyq qaryzdar jylyna 7 paıyz ústememen 25 jylǵa beriledi. Ári alǵashqy jarna – 20 paıyz.
Baǵdarlamaǵa Qazaqstannyń kez kelgen azamaty qatysa alady. Sharttary da jeńil. Azamattyń basynda jyljymaıtyn múlki bolmaýy shart. Ári baǵdarlama boıynsha Qazaqstannyń kez kelgen óńirinen Almaty, Astana, Atyraý qalalarynyń eń maksımaldy 25 mln teńgege baspana satyp alýǵa bolady.
Jalpy baǵdarlama tórt kezeńde iske asyrylady:
Birinshiden, qarjy tartýdyń formasyn qalypqa keltirý kerek. Ekinshiden, baǵdarlamany tıimdi iske asyrý úshin kompanıany qarjy agenttigi tanýy kerek. Úshinshi kezeńde, baǵdarlamanyń jańa múmkindikteri árkimge jeńildik talaptaryn beretin memlekettik teńdesiz qadamy. Tórtinshiden, jeńildik berilgen ıpotekalyq nesıeler tolyq qamtamasyz etilgen jáne túgel qaıtarymdy bolýǵa tıis ekendiginiń kórinisi.
