Qazaqstan Respýblıkasynyń Prezıdenti bıylǵy 5 qazandaǵy Qazaqstan halqyna Joldaýy barysynda «7-20-25» baǵdarlamasyna qazaqstandyqtardyń belsenen aralaspaǵanyn aıtyp, sheneýnikterdi synaǵan bolatyn. Osyǵan oraı baǵdarlamany halyqqa tıimdi etip jasaýdyń joldaryn izdeýdi tapsyrdy. Nursultan Nazarbaevtan sóz estigen sheneýnikter birden iske kirisip ketti. Qazaqstan azamattary endigi «7-20-25» baǵdarlamasy arqyly ońaı ári tıimdi jolmen páter alý múmkindigine ıe boldy. Eń qyzyǵy, qazaqstandyqtar aqshalaryn únemdeıdi. Seeıýi elimizde 50 myńǵa jýyq turǵyn úı sertıfıkattary iske qoslmaq. Maqsaty - alǵashqy jarnany arzandatý. Al 2018 jyldyń aıaǵyna deıin jalpy sany 10 myń sertıfıkat baǵdarlamaǵa qatysýǵa nıetti azamattarǵa berilmek.
Sheneýnikter osylaısha baǵdarlama boıynsha úı alǵysy keletin azamattarǵa úlken jeńildik jasaǵysy keldi. Ár oblys ákimi atalmysh sertıfıkattardy óz óńiriniń turǵyndary arasynda beredi.
«Baspana» Ipotekalyq uıymynyń basshysy Qaırat Altynbekovtiń aıtýynsha, jergilikti búdjetten jeńildetilgen ıpotekanyń alǵashqy jarnasyn sýbsıdıalaý boıynsha áreket etýdi Memleket basshysynyń ózi tapsyrǵan. Ári mundaı sertıfıkatty alatyn mamandyq ıelerin de atapty.
«Nazarbaevtyń tapsyrmasy boıynsha, turǵyn úı sertıfıkattaryn berý muǵalimder, dárigerler, polısıa qyzmetkerleri jáne ózge de jergilikti óńirlerge qajetti mamandyq ıeleri úshin ıpotekanyń qoljetimdiligi arta túspek», - dedi Qaırat Altynbekov baspasóz konferensıasy kezinde.
Buǵan qosa, alǵashqy jarnany azaıtý boıynsha jumys prosesine «Nur Otan» partıasy qoldaý kórsetetin bolady. Ári sertıfıkattar osy aptadan bastap ár óńirlerde berile bastaıdy.
«7-20-25» sertıfıkaty 1 mıllıon teńgeni quraıdy. Al Qazaqstan azamattaryn «7-20-25» baǵdarlamasyna qatysýǵa yntalandyrý úshin búdjetten keminde 50 mıllıard teńge bólinedi», - Baspana» Ipotekalyq uıymynyń basshysy.
Aıta keteıik, buǵan deıin de alǵashqy jarnany azaıtý maqsatynda sharalar qoldanylǵan. Qyrkúıekte «7-20-25» baǵdarlamasy aıasynda «Jas arman» men «Qamqor baspan» ónimderi ázirlengen edi. Al endi osy ónimder biriktirilip, alǵashqy jarnany jeńildetý maqsatynda 1 mıllıon teńgelik sertıfıkat ázirlendi.
Aıta keteıik, bankter bıyl shilde aıynan bastap «7-20-25» baǵdarlamasy boıynsha ıpotekalyq nesıe berýdi bastap ketti. Al jeńildetilgen ıpotekany kimder ala alady? Bul saýalǵa QR Ulttyq bank tóraǵasy Danıar Aqyshev jaýap berdi. Aıtýynsha, ıpotekalyq baǵdarlamaǵa turaqty jumys bar kez kelgen adam qatysa alady. Alaıda ol azamattyń atynda baspana bolmaýy tıis. Jáne nesıe tarıhy da durys bolýy kerek. Budan buryn Elbasy «7-20-25» baǵdarlamasyn júzege asyrý úshin Ulttyq bank pen Úkimet birlesip jumys isteý kerek.
«Ulttyq banktiń, ekinshi deńgeıli bankter men qor naryǵynyń múmkindikterin iske qosý kerek. Ulttyq bank keminde 1 trıllıon teńge qarjyny tartatyn arnaıy kompanıa quryp, ony bankterdiń joǵaryda aıtylǵan sharttaryna jaýap beretin jańa ıpotekalyq nesıelerin satyp alýǵa jumsaýy qajet. Baǵdarlamany júzege asyrý nátıjesinde mıllıon qazaqstandyq baspana alý múmkindigine ıe bolady», – degen edi Nursultan Nazarbaev.
