Qamshy.kz aqparat agenttigine Madına Ábdet esimdi azamatsha jaqynda týysynyń basynan ótkergen jaǵdaıyn baıandap habarlasty. Týysynyń sábıi Túrkistan oblysy Keles aýdany Abaı aýyldyq aýrýhananyń perzenthanasynda óli týǵan. Onyń aıtýynsha, 9 aıda balanyń densaýlyǵynda kinárat bolmaǵan. Perzenthanaǵa bosanýǵa kelgende de bala tiri bolǵan, ıaǵnı júregi soǵyp turǵan. Abaı aýylyndaǵy aýrýhanada bosanǵan Nurjamal Qonysbaıdyń týystary "balanyń óli týǵany dárigerlerdiń salǵyrttyǵynan" degen oıda.
- Nurjamal 9 aı boıy dárigerlerge tekserilip turdy. Eshqandaı ınfeksıa tappady. Óziniń de, sábıdiń de densaýlyǵynda kinárat bolmady. Perzenthanada ony bosanýǵa qabyldaǵanda da bári jaqsy edi. Jergilikti ýchaskelik dárigerge kóringende bári durys ekenin aıtqan. Nurjamaldy aýrýhana qyzmetkerleri 2018 jyldyń 27 qazanynda saǵat 14.00-de qabyldap aldy. 17.00-de Nurjamaldyń janyna partner retinde kirgizildim. Sol ýaqytta balanyń júregi toqtap qalǵanyn aıtty. "Kardıologqa kórinip, ÝDZ-ge túseıik" desek, eki dáriger de ornynda joq. ÝZD mamanyna habarlassa, telefonmen «Barmaımyn» dep aıqaılady. Ol eki saǵattan keıin bir-aq keldi. Dárigerler «kesarevo jasaıyq, bala múmkin tiri shyǵar» deıdi. Ózderi bilmeıdi, - deıdi ashynǵan Madına Ábdet.
Nurjamal Qonysbaıdyń - jasy 20-da. Bul onyń tuńǵyshy edi. Sondyqtan operasıa jasaýǵa kelispegen. «Ózim bosanamyn» dep sheshken. Nurjamal saǵat 20.00-de bosanǵan, sábıi óli týǵan.
-Deni saý áıel dúnıege ákelgen deni saý sábıdiń júregi qalaı ózinen -ózi toqtap qalady?! Dárigerlerden surasaq naqty jaýap bere almaı otyr. «Ondaı jaǵdaılar bolyp turady»,- dep qysqa qaıyrady. Áli naqty dıagnoz da qoıylmaǵan, - deıdi Madına Ábdet.
Keshe Nurjamal Qonysbaı perzenthanadan shyqty.
Nurjamal Qonysbaıdyń týystary máseleniń anyq-qanyǵyna kóz jetkizý úshin medısınalyq saraptama jasatyp jatyr. Onyń qorytyndysy 10 kúnnen keıin daıyn bolady.
Nurjamal Qonysbaıdyń týystary jan aýyrtqan osy oqıǵaǵa qatysty prokýratýraǵa aryz túsirdi. Olar bul isti aıaǵyna deıin jetkizbek oıda. Bul tek bir sábıdiń ǵana ókinishti taǵdyry emes, osy perzenthanada dúnıege keletin barlyq sábılerdiń densaýlyǵy men ómiri úshin jasalyp jatqan is ekenin aıtady.
- Olarǵa memleketten apparattarǵa tıisti qarjy bólingenimen jańalanbaǵan. 30 jyldan beri kele jatqan eski apparattar. Onda da tek ÝDZ ǵana bar. Basqa apparattar joq. Ádiletsizdik emes pe?! Kardıolog bylaı tursyn, ÝDZ jasaıtyn maman jumys ornynda emes. Biz bir balanyń óli týylǵanyna qadalyp turǵan joqpyz. Qanshama bala dúnıege kelip jatyr ol jerde. Sábıler shetinep jatyr, - deıdi Madına Ábdet.
Biz atalǵan oqıǵaǵa baılanysty perzenthananyń bas dárigeri Nuraly Jaqypovqa habarlastyq, alaıda ol kisi ornynda bolmaǵandyqtan, hatshysymen tildestik. Hatshynyń aıtýynsha, bas dárigerdiń qyzmet kórsetý sapasy boıynsha jáne emdeý isi boıynsha eki orynbasary bar.
Qyzmet kórsetý sapasyna jaýap beretin Ǵanı Bahtıaruly ÝDZ men kordıologtyń jumys ornynda bolmaǵanyn jumys ýaqytynyń aıaqtalýymen túsindirdi.
- ÝDZ jasaıtyn maman da, kardıolog ta saǵat 16.00-ge deıin jumys isteıdi. Qajet bolǵan jaǵdaıda olardy úıinen shaqyrtamyz, - deıdi.
Emdeý isine jaýapty orynbasar Ábdýǵappar Momınov te áriptesiniń sózin qaıtalady. 2018 jylǵa arnalǵan perzenthanadaǵy óli týǵan sábıler men tiri týǵan sábılerdiń statısıkasyn surap edik, aqparatty naqtylap, jarty saǵattan keıin habarlasýymyzdy ótindi. Alaıda, jarty saǵattan keıin de, bir saǵattan keıin de eshqaısysy telefon tutqasyn kótermedi.
Madına Ábdettiń "apparattardyń eskiligi jáne úkimetten qajetti jabdyqqa aqsha bólingeni, biraq onyń dókeılerdiń qaltasyna ketip jatqany týraly" aqparatyn naqtylaý úshin biz bas dáriger Nuraly Jaqypov eki kún boıy habarlasqanymyzben, esh tildese almadyq. Demek, bas dáriger jýrnalıserdiń suraqtaryna jaýap berýden qashyp otyr. Hatshy qyzdyń aıtýy boıynsha, eki kún boıy bas dáriger jumys ornynda bolmady, jeke telefony arqyly da tildesýden bas tartty.
Bul másele Qamshy.kz aqparat agenttiginiń udaıy nazarynda bolady. Atalǵan oqıǵaǵa qatysty aldaǵy ýaqytta Qazaqstan Respýblıkasy Densaýlyq saqtaý mınıstrligine hat joldaıtynymyzdy eskertkimiz keledi.
