Prezıdenttiń bes áleýmettik bastamasy elimizdiń ár óńirlerinde qalaı júzege asyp jatyr? Qaı oblys, qaı qala belsendi? Muny saralaý maqsatynda Úkimet basy oblys-oblysty aralap, Elbasy tapsyrmasynyń oryndalyp jatqan-jatpaǵandyǵyn anyqtap júredi. Bul joly Baqytjan Saǵyntaev jumys saparymen Almaty oblysyna bardy. Oblystaǵy Kásipkerlerge qyzmet kórsetý ortalyǵyna baryp, Elbasynyń bes áleýmettik bastamasy men memlekettik baǵdarlamalardyń iske asyrylý prosesin baqylady.
Sapary barysynda Premer-mınıstrge óńirdegi ekonomıkalyq ósim, jalpy óńirlik ónim mólsheri týrasynda aqparat tanystyryldy. Máselen sońǵy tórt jylda Almaty oblysynyń ekonomıkalyq ósimi 4,2 paıyzdy quraǵan. Al jalpy óńirlik ónim alǵashqy jarty jyldyqta-aq 1,09 trıllıon teńgeni qurap úlgerdi.
Oblys ákiminiń birinshi orynbasary Turlashov aýyl sharýashylyǵy salasy boıynsha oblystyń jetistikterin atady. Aıtýynsha, 2017 jylǵymen salystyrǵanda bıyl jalpy ónim kólemi 3,5 paıyzdy qurady. Jalpy qańtar-qyrkúıek aılarynda 488 mıllıard teńgege jetti.
«Óńirde qant qyzylshasy, júgeri alqaptaryn kóbeıtý jumystary júrgizilip jatyr, buǵan qosa qant óndirý, júgeri óńdeý jumystary da shet qalǵan doq. Mal sharýashylyǵy da aıtarlyqtaı jemis berdi», - dedi L. Turlashov.
Oblysta óńdeý ónerkásibiniń eksporty da basym ekenin aıta ketken jón. Kóbine eksporttalatyn azyq-túlik, hımıa jáne farmasevtıka, qurylys jáne mashına jasaý salalary. Elbasynyń Joldaýyndaǵy tapsyrmaǵa sáıkes eksportqa baǵdarlanǵan kásiporyndarǵa qarjylaı nemese qarjylaı emes qoldaý kórsetýdi oblys basshylyǵy qolyna alǵan.
Aýyl sharýashylyǵyn damytýdaǵy taǵy bir mańyzdy faktor – aýyl sharýashylyǵyna salynatyn ınvestısıa. Oblys ákimi orynbasarynyń aıtýynsha, 2017 jyly AÓK-ke 42,7 mıllıard teńge, 2018 jyly – 53,8 mıllıard teńge tartyldy. 2022 jylǵa qaraı oblys bıligi bul kórsetkishti 99 mıllıard teńgege deıin jetkizýdi kózdep otyr.
Baqytjan Saǵyntaevqa kásipkerlikti damytý týrasynda baıandaldy. Óńirde bıznesti qoldaý úshin 11,1 mıllıard teńge bólý qarastyrylǵan. Oblys ákiminiń orynbasary Tuıaqovtyń baıandamasyna sáıkes, oblysta qańtardan beri 1,5 myńnan astam jumys orny ashylǵan. Búgingi tańda JÓÓ-degi shaǵyn jáne orta bıznes úlesi 28 paıyzdy quraıdy, 2030 jyly bıznes úlesin 40 paıyzǵa deıin ulǵaıtý josparlandy.
Memleket basshysynyń bes áleýmettik bastamasyn júzege asyrý týrasynda da baıandaldy. Turlashovtyń habarlaýynsha, «7-20-25» baǵdarlamasy boıynsha óńirde turǵyn úı alýǵa nıetti 56 azamat ótinim jazǵan.
133,5 myń adamnyń eńbekaqysy kóterildi. Joǵary bilim alý múmkindigi ulǵaıyp, 2018-2019 oqý jylynda barlyǵy 5231 memlekettik grant berildi. Budan bólek 1930 orny bar 10 jataqhana salyndy.
«Shaǵyn nesıe berý» baǵdarlamasyna sáıkes, 2018 jyly oblysqa qosymsha 1,3 mıllıard teńge bólindi. 3 qala men 12 aýdan gazdandyryldy.
Almaty oblysynyń jetistikterine qanyqqan Baqytjan Saǵyntaev sapary sońynda óńirdiń kórkem jerlerin, jańa nysandaryn aralady.
Bıyl naýryzda Úkimet otyrysynda Saǵyntaev Elbasy jarıalaǵan bes áleýmettik bastama boıynsha memlekettik organdarǵa tıisti tapsyrma bergen edi.
«Memleket basshysynyń óz bastamalaryn arnaıy Úndeý arqyly jarıalap, onda qazaqstandyqtarǵa shynaıy alǵysyn bildirýi onyń mańyzdylyǵyn arttyra túsedi. Bul – Elbasynyń halqyna usynǵan prezıdenttik ári perzenttik syıy. Ol bastamalardyń árqaısysy búgingi tańda halyqtyń kókeıinde júrgen eń mańyzdy máselelerdi qamtıdy», — degen Baqytjan Saǵyntaev halyqty qoljetimdi baspansmen qamtý, salyq júktemesin azaıtý, joǵary bilim alýdyń qoljetimdiligi, shaǵyn nesıe berý júıesin ulǵaıtý jáne eldi gazdandyrý syndy Elbasynyń tapsyrmalaryn ár sheneýnikke júktep, júzege asyrýyn tapsyrdy.
