Qazaqan shyqqan tuńǵysh Olımpıada chempıony Jaqsylyq Úshkempirov aqtóbelik sportshylarǵa jetistikke jetýdiń syryn ashty.

1980 jylǵy grek-rım kúresinen Máskeý Olımpıadasynyń chempıony Jaqsylyq Úshkempirov is-saparmen Aqtóbe qalasyna keldi. İs-sapar kezinde óńirdegi jańadan boı kótergen sport nysandardy aralap, sportshylarmen kezdesti. Aldymen, bıyl qazan aıyndaǵy Elbasynyń Aqtóbe oblysyna sapary barysyndaǵy eki jańadan ashylǵan «ASE» Tenıs ortalyǵy men Muz saraıyna baryp, ǵımarattardyń jaı-kúıimen tanysty.

Odan ári qazaqtyń áıgili palýany aýyl balalary tárbıelenip jatqan Eset batyr atyndaǵy mektep-ınternat-kolledjine bardy. Ol jastarǵa tilek sózder arnap, jetistikke jetýdiń qıyn joly týraly shyndyqty aıtty. 

-Qazir qandaı jarysqa baramyz desek te jolymyz ashyq. Al, burynda 15 Respýblıkanyń ishinen jalǵyz baratynbyz. Men Sovet Odaǵynyń chempıony bola tura, 25 jasymda Monrealge bara almadym. Qaıtkende taǵy 4 jyl kútip, 30 jasymda Olımpıadaǵa baryp, chempıon atandym. 31 jasymda Álem chempıony boldym. 32 jasymda Álem Kýbogyn jeńip aldym. Qaıtadan Sovet Odaǵynyń chempıony bolyp, úlken sportty qoıdym. Sporttyń, jalpy kez kelgen salanyń shyńyna shyǵý úshin soǵan búkil ómirińdi arnaýyń kerek. Elim, halqym, jerim dep aıanbaı ter tógip, jumysty aıaǵyna deıin jetkizý qajet. Esterińde bolsyn, ózim úshin deseńder, eshqashan jeńiske jetpeısińder, - dedi Jaqsylyq Úshkempirov jastardyń aldynda.

Sonymen qatar, Jaqsylyq Úshkempirov Aqtóbe oblysynyń olımpıada rezervin daıarlaý ortalyǵynda bastaý alǵan bokstan CSRO halyqaralyq dárejedegi sport sheberi Baýyrjan Aqsholaqovty eske alýǵa arnalǵan HH halyqaralyq týrnıriniń saltanatty ashylýyna qatysty. Sharada sóz alǵan Olımpıada chempıony, barlyq qatysýshylarǵa sáttilik tilep, óziniń quttyqtaý sózin arnady.

Osylaısha, qazaq palýany Aqtóbe sportynyń tynys tirshiligimen tanysyp, oǵan óte joǵary degen baǵa berdi.

-Qazirgi balalarymyz óte baqytty dep esepteımin. Sebebi, mynadaı jaǵdaı bizdiń kezimizde bolǵan joq. Aımaqta sportshylardyń júıeli túrde sportpen shuǵyldanýyna barlyq jaǵdaı jasalynǵan. Jyl saıyn aımaq kórkeıip, sport nysandary kóptep salynyp jatyr. Sol sebepti de, oblys basshysy Berdibek Saparbaevqa sportqa degen erekshe qoldaýy úshin  úlken alǵysymdy bildiremin,- dedi Jaqsylyq Úshkempirov.