Aqtóbe oblysynyń ákimi Berdibek Saparbaev Ortalyq komýnıkasıalar qyzmetinde ótken baspasóz máslıhatynda Memleket basshysynyń bes áleýmettik bastamasyn júzege asyrý boıynsha atqarylyp jatqan jumystar týraly aıtty.

Aıta keteıik, Prezıdenttiń bastamalary aqtóbelikterden keń qoldaý tapty, sondyqtan  memleket basshysynyń teńdessiz baǵdarlamasyn júzege asyrýda oblys Qazaqstanda alǵashqylardyń biri bolyp kiristi.

• Bizde turǵyn úı sektoryn damytýdyń myqty irgetasy qalanǵan. 2017 jyldyń ózinde 792 myń sharshy metr turǵyn úı paıdalanýǵa berildi. Aǵymdaǵy jyly 24 myń aqtóbelikti baspanamen qamtý úshin kem degende 900 sharshy metr turǵyn úı salý josparda bar. «7-20-25» jáne «Nurly jer» baǵdarlamasyn júzege asyrý esebinen óńirdegi turǵyn úı qurylysynyń rekordtyq kólemi artyp, alǵashqy jarna 20 paıyzdan 10 paıyzǵa tómendetildi, - dedi oblys basshysy.

Salyq aýyrtpalyǵyn tómendetý esebinen 90 myń aqtóbeliktiń jalaqysy 9%-ke artady. 2800 orynǵa arnalǵan keminde 8 zamanaýı jataqhana qurylysyn salý josparlanyp otyr, qosymsha 2 myńnan astam grant bólindi.

Sondaı-aq myńdaǵan aqtóbeliktiń shaǵyn nesıeleý qyzmetterin paıdalana otyryp óz isin bastaýǵa múmkindigi bar. Osy maqsattarǵa qosymsha 2 mlrd. teńge bólindi. Jalpy alǵanda, oblysta shaǵyn nesıeleýge 4,9 mlrd. teńge qarastyrylǵan, al qarajattyń basym bóligi negizinen aýyldyq kásipkerlikti damytýǵa baǵyttalatyn bolady. Oblystaǵy eldi mekenderdi gazdandyrý úshin 22 jańa jobany iske asyrý tabıǵı gazben jabdyqtaý deńgeıin 88-den 89 paıyzǵa deıin jetkizedi.