Álemdegi ártúrli sanksıalar, AQSH - tyń birqatar eldermen aradaǵy saýda soǵysyna baılanysty tórtkúl dúnıedegi baılardyń turaqty tabysy bıyl kilt tómendep jatyr. Árıne, munyń sebebi ártúrli ekeni sózsiz. Biraq Bloomberg agenttigi 2018 jyly kóptegen kompanıalar úshin sátsiz jyl bolǵanyn alǵa tartýda. Halyqaralyq naryqtaǵy kúrdeli jaǵdaıǵa baılanysty álemniń baılary bıyl 511 mıllıard dollar joǵaltqan. Az aqsha emes. Sonda olar kimder?
Mysaly, Amazon kompanıasynyń qojaıyny Djeff Bezos qyrkúıek aıynyń ózinde 168 mıllıon dollar tabys tapqan, alaıda onyń kapıtaly jyl sońyna deıin 69 mıllıard dollardan 53 mıllıard dollarǵa kúrt tómendegen.
Al Facebook áleýmettik jelisiniń ıesi Mark Sýkerberg daǵdarystyń áserinen 23 mıllıard dollar joǵaltqan.
2018 jyl azıalyq kásipkerler úshin de qolaıly jyl bola qoıǵan joq. Mysaly, Dalian Wanda Group keompanıasynyń negizin qalaýshy Van Szánlınniń óndirisi 11,1 mıllıarl dollar shyǵynǵa ushyraǵan. Taıaý Shyǵysta da jaǵdaı ońyp turǵan joq. Saýd Arabıasyndaǵy birqatar bıznesmenderdiń sybaılas jemqorlyqqa baılanysty ustalýyna baılanysty olar da orasan zor aqsha joǵaltty. Hanzada ál Valıdtiń baılyǵy 3,4 mılldıard dollarǵa azaıǵan. Bıylǵy jyly eýropalyq kásipkerlerdiń de eńsesi birshama túsip tur. Avtokólik bólshekterin óndirýmen aınalysatyn Schaeffler Gruppe kompanıasynyń qojaıyny Shefflerdiń áýleti 17 mıllıard dollar zıan shekti. Meksıkalyq mıllıarder Karlos Slım Latyn Amerıkasyndaǵy baı adam ári mobıldik baılanystyń eń iri operatory retinde burynyraqta álemdegi baılardyń kóshin bastaǵany belgili. Bıyl birshama shyǵynǵa ushyraǵan kásipker daǵdarystan keıin tizimde altynshy orynǵa tústi. Alaıda onyń baılyǵy báribir az emes.
Munaı baǵasynyń quldyraýy, AQSH pen Eýropa elderiniń sanksıalary reseılik kásipkerlerdiń óndirisine de áser etýde. Bárinen buryn reseılik bıznesmen Oleg Derıpaskanyń ál-aýqaty 5,7 mıllıard dollarǵa tómendegen kórinedi.
Biraq bul bir sáttik nárse ekenin aıta ketken jón. Jalpy álemdegi baılardyń tabysy birde tómendep, birde joǵarylap turatyny anyq.
