Belsendi Talǵat Aıan Facebook-tegi paraqshasynda túrmede otyrǵan Maks Boqaevtyń sálemin jarıalady. 

"Jaqynda túrmeden bosap shyqqan bir jigit habarlasty, Makspen bir jasaqta bolypty, sálemin jetkizdi. Jaqyn dosyńmen sóıleskendeı bolyp qalady ekensiń. Qal-jaǵdaıy jaman emes deıdi, televızor kórmeıdi eken, kitap pen gazet oqıdy, radıodan jańalyq tyńdaıdy, basqa sottalǵandarǵa zańdyq keńestermen kómektesedi. Osylaı Makstiń túrmedegi ýaqyty ótip jatyr. Eshbir adamǵa zıany tımegen Makstiń otyrǵanyna úsh jylǵa tolýǵa jaqyn. Umytpaıyq, aǵaıyn!" - dep jazdy Talǵat Aıan. 

Eske sala keteıik, 2017 jyly 25 jeltoqsanda Alashordanyń qurylǵanyna  100 jyl tolýyna oraı Qamshy.kz aqparat agenttigi  ıgi jaqsylardyń basyn qosyp, «Alash arystarynyń 100 izbasaryn» marapattaǵan bolatyn. Marapattalǵandardyń qatarynda búginde túrmede jatqan qoǵam belsendisi Maks Boqaev ta boldy. Alaıda marapattaý keshine Boqaevtyń medalin alýǵa anasy Rahıla Qojasova keldi. 

♦Alashtyń ǵasyrlyq toıynda Alash arystarynyń izbasarlary marapattaldy (foto)

"Qamshy" portalynyń bastamasyna rıza bolǵan ana óz ulynyń aýyz toltyryp aıtarlyqtaı batyrlyq jasamaǵanyn, tek óziniń azamattyq boryshyn ótegenin aıtqan edi.

"Qazirgi jastardyń bári bilimdi, sanaly. Tek sol jastardy jetelep, baǵyt-baǵdar kórsetetin úlken býyn qajet. Kóbinese biz jastardy synap jatamyz, alaıda jastar jaman bolsa da, biz olardy óz balamyzdaı kórýimiz kerek. Meniń ulym Maks Boqaev 2016 jyly 23 sáýirde beıbit mıtıńke shyǵyp, «Jerdi satpaıyq, jerdi sheteldikterge bermeıik» degen sózi úshin 5 jylǵa sottalyp, túrmede otyr", — dedi Rahıla Qojasova.