La-Mansh buǵazynyń mańynda ushaq joǵalyp ketti, osyǵan baılanysty bir aptadan beri jahan jurty dabyra kúıde. Sebebi ushyq bortynda álemdegi myqty fýtbolshylardyń biri argentınalyq Emılıano Sala bar edi. 28 jastaǵy Sala ótken aptada vallıalyq «Kardıff Sıtı» komandasymen kelisimshartqa otyrǵany belgili.
Derekke júginsek, fransıalyq avıasıalyq bılik «Paıper Malıbý» bir motorly ushaǵynyń bortynda Salanyń bolǵanyn rastap otyr. Sonymen qatar Kardıff áýejaıy da Fransıanyń Nant qalasynan ushaqtyń kelýin kútip otyrǵanyn málimdegen.
Al «Kardıff sıtı» fýtbol klýby jaǵdaıdyń mán-jaıyn anyqtaýǵa kirisip te ketti.
Ushaq ótken dúısenbiniń keshinde radardan joǵalyp ketti, sońǵy ornalasqan aımaǵy Normand jaǵalaýynyń birindegi Kasket shamshyraǵynyń aınalasy edi. Teńizshiler arasynda bul meken qaıǵyly oqıǵalarmen tikeleı baılanysty, sebebi kóbine dál osy aımaqta kemeler apatqa jıi ushyraıtyn kórinedi.
Brıtandyq jaǵalaý kúzetshisi ushaqtyń dál sol shamshyraq (maıak-red) mańynda apatqa ushyraýy múmkin ekenin aıtyp otyr. Sonymen qatar, olar izdeý sharalary úshin eki tikushaqty jibergen. Alaıda búginge deıin ońtaıly nátıje bolǵan joq.
Dúısenbi kúni túnde aýa raıynyń qolaısyzdyǵyna baılanysty izdeý sharalary toqtatylyp, seısenbiniń tańyna qaraı taǵy jalǵasqan bolatyn.
"Paıper Malıbý" ushaǵy
Normand jaǵalaýynyń polısıa qyzmeti ushaqpen sońǵy baılanystyń 700 metr bıiktikte bolǵanyn habarlady. Al brıtandyq meteorologtar ushaq joǵalǵan aımaqta jaýyn-shashyn bolǵanyn málimdedi, alaıda aıtarlyqtaı qatty emes. Jeldiń jyldamdyǵy da apatqa ushyratatyndaı emes.
Al derekke júginsek, Emılıano Sala fýtbol álemindegi karerasyn tek fransýzdyq klýbtarda ótkizdi ári eń myqty shabýylshylardyń biri boldy.
Fýtbolshy «Tvıtterdegi» sońǵy jazbasynda «Nant» fýtbol komandasymen qoshtasqanyn jazǵan.
Emılıano Salanyń joǵalyp ketkenine ákesi de qatty qapalanyp otyr.
-Sene almaı otyrmyn. Qoldan keler sharanyń bolmaǵanyna ashynamyn. Endi ne bolatyny túsiniksiz. Jaqsy jańalyqtan úmittimiz. Bilmeı qaldyq. «Kardıffke» ótkeni ózi úshin de, otbasy úshin de úlken múmkindik edi. Anyǵy, biz solaı jorydyq, oıladyq», - dedi ákesi Get French Football News basylymyna bergen suhbatynda.
24 qańtarda brıtandyq Gernsı jaǵalaýynyń polısıasy izdeý sharalarynyń toqtatylǵandyǵyn habarlady. Sebebi ushaq jolaýshylarynyń tiri qalýy ekitalaı edi. Al izdeý-qutqarý sharalary tórt kúnge jalǵasqanymen, esh nátıje bolmady.
Polısıadan úmitin úzgen Salanyń otbasy fýtbolshyny izdeýge ózderi kirisip ketti.
26 qańtardan bastap «Pampeı Malıbý» ushaǵy joǵalǵan aımaqta izdestirý sharalary qaıta jalǵasty. İzdeý jumystaryn jalǵastyrý úshin GoFundMe qory ashyldy. Nebári eki kúnniń ishinde qorǵa 3,8 myń adam 300 myń eýro aýdardy. Aqsha aýdarǵandardyń qatarynda álemge tanymal fýtbolshylar da bar. Solardyń biri - 30 myń eýro aýdarǵan fransıalyq shabýylshy Kılıan Mbappe.
Osy oraıda eki kún buryn «Barselona» fýtbol klýbynyń kapıtany Lıonel Messı Instagram jelisindegi paraqshasynda Salany izdeý sharalaryn toqtatpaýdy ótinip surady.
«Úmitimiz sóngen joq, Emılıanony izdeýdi toqtatpaý kerek. Otbasy men dostaryn qoldap, Salanyń aman-esen tabylýyn tileımin, duǵa etemin», - dep jazdy Messı.
Messıden ózge de tanymal fýtbolshylar bılikten izdestirý sharalaryn jalǵastyrýdy surap otyr.
Emılıano Salanyń «Kadrıfpen» kelisimsharty 17 mıllıon eýroǵa baǵalanǵanyn aıta keteıik.
