Laýlap janǵan ot deıdi,
Zarym nege jetpeıdi?
Shyryldaǵan bes sábı
Kóz aldymnan ketpeıdi!..

Qysqa ma ediń, ómir-aı!
Qapa ma ediń, kóńil-aı!
Otqa oranyp joq bolǵan
Bes sábıdiń ólimi-aı!

Qaldy kimge jer keńip,
Kimge mundaı «erkelik»?
Bir-aq túnde bes sábı
Ólgen deı me órtenip!

İshim kúıip bara ma?
Sansyz suraq sanada...
Ólgen deıdi bes sábı
Ana aty joq qalada!

Ol bir zulmat tún eken,
Ajal kezip júr eken.
Mundaı kúıge Qazaqty
Jetkizgender kim eken?

Kórgen kúni azap pa,
Kórgen kúni mazaq pa?
Nege Qazaq, jumyssyz,
Baspanasyz - Qazaq pa?..

Aırylǵan kim dininen,
Aırylǵan kim, Tilinen?
Ysyldaı ma qazaqqa
Sýyq jylan ininen?

Nege Qazaq tonaldy,
Nege baılyq joǵaldy?
Bes sábıdiń ólimi
Oılantar ma olardy?..

Dármensiz ult kekti me,
Ury, jemqor – epti me?
Janushyrǵan bes sábı
Otqa órtenip ketti me?

Eı, toımastar, toıdyń ba,
Eı, qoımastar, qoıdyń ba?
Bes sábıdiń ajaly,
Kim-kimderdiń moınynda?..

Jumash Kókbóri