Álemge "Hıdjabtaǵy muz hanshaıymy" retinde tanymal bolǵan Zahra Ları kim? Oqyrman nazaryna usynady Qamshy.kz aqparat agenttigi.

Zahra Ları – Birikken Arab Ámirlikteriniń mánerlep syrǵanaýshysy. Halyqaralyq jarystardaǵy Birikken Arab Ámirlikteriniń birinshi fıgýrısti. Álemge "Hıdjabtaǵy muz hanshaıymy" retinde tanymal.

1995 jyly 3 naýryzda dúnıege kelgen Zahranyń ákesi – Birikken Arab Ámirliginiń azamaty, al anasy amerıkalyq.

12 jastan bastap kónkımen syrǵanaýdy bastaǵan. Zahranyń aıtýynsha, ol aldymen anasynan osy sport túrimen shuǵyldanýǵa ruqsat suraıdy. Alaıda anasy ruqsat etpegen, al ákesi keliskendeı bolady. Zahra kásibı deńgeıde syrǵanaý múmkindigine ıe bolǵan kezde, kerisinshe ákesi túbegeıli qarsy bolady, biraq anasy osy joly qyzyn qoldap, ákesin kóndirýge kómektesken.

Zahranyń anasy Rýkaı Karen kúıeýin qyzynyń jarystarǵa qatysa alatynyna jáne oǵan qatysýy kerek ekendigine sendirý ońaı bolmaǵanyn aıtady. Bastapqyda ákesi Zahranyń ónerin erler aýdıtorıasynyń aldyndaǵy qyzynyń bıi retinde qabyldaǵan. Biraq keıin qyzynyń muzda qanshalyqty ádemi ekenin kórdi. Ol Zahrany qatty jaqsy kóretinin jáne onyń baqytty bolǵysy keletinin túsinedi. Sonymen qatar Zahra hıdjabyn sheshpedi, ıslamǵa qarsy eshteńe jasamady.

2007 jyly Zahra Larrı óz ómirindegi alǵashqy sporttyq jarysyn jeńip aldy. 2012 jyly Italıada halyqaralyq deńgeıde ótken birinshi baıqaýda jeńimpaz atandy.

Zahra Ları Birikken Arab Ámirlikteriniń halyqaralyq deńgeıge shyqqan jáne birinshi bolyp hıdjabpen bılegen alǵashqy mánerlep syrǵanaýshy atandy, sondaı-aq Zahra Larıdiń arqasynda Birikken Arab Ámirlikteri Halyqaralyq Mánerlep syrǵanaýshylar Odaǵynyń turaqty múshesi atanǵan alǵashqy Taıaý Shyǵys eli boldy.

Buqaralyq aqparat quraldaryna  Zahra Ları «hıdjabtaǵy muz hanshaıymy» retinde tanyldy. Mánerlep syrǵanaýshynyń aıtýynsha, bul laqap oǵan óte unaıdy, sebebi ol muz aıdynyna amerıkalyq "Ice Princess" fılmin kórgennen keıin kelgen.

"Men bul fılmdi qatty unatamyn, ony júzden asa ret kórdim! Men ózime: "Mine, men de osylaı istegim keledi" dedim".

 "Men barlyq qyzdarǵa ózderiniń unatatyn isterimen shuǵyldanýyn jáne densaýlyqtary myqty bolyp, sáttilik serigi bolsyn dep tileımin. Sportpen shuǵyldansa deımin. Kishkentaı tastaı kedergiler taýdaı bolyp kórinbesin. Barlyǵy óz armandaryna qol jetkizip, adamdar arasyndaǵy aıyrmashylyqtardy izdeýge emes, uqsastyqtardy kórýge tyryssa eken. Bul meniń barlyq tilegim", - deıdi ol.

Zahra Larıdiń aıtýy boıynsha, ony alǵa jeteleıtin qanshama qulap, talpynyp jasaǵan jattyǵý men eńbekten keıin eń sońynda minsiz trúk jasap, qıyndyqty jeńý sezimi eken.

"Meniń elimde qyzdar sportpen az shuǵyldanady, ásirese mánerlep syrǵanaýmen. Men muzda kúnde saǵat 7:30-ǵa deıin jáne saǵat 16:00-de taǵy bir jarym saǵat syrǵanaımyn" deıdi Zahra. "Bul qıyn emes, men kónkımen syrǵanaýdy óte jaqsy kóremin jáne tabysqa jetýdi qalaımyn".

Qazirgi kúni Zahra Ları Abý-Dabı ýnıversıtetinde oqıdy jáne ol burynǵy reseılik mánerlep syrǵanaýshy Aleksandra Ievlevanyń shákirti.