Ahmet Baıtursynuly murajaı-úıiniń aýlasynda maskúnemder órip júr. Osyǵan qatysty shara qoldanaıyn degen ákimdik joq. Óziniń janaıqaıyn murajaı dırektory Raıhan Imahanbet Facebook-tegi paraqshasy arqyly bildirdi dep habarlaıdy Qamshy.kz aqparat agenttigi.

«Ahmet Baıtursynuly mýzeı-úıiniń aýlasy maskúnem, bomjdardyń mekenine aınaldy!
Mýzeı sakraldi tizimge ense de, memleket qaramaǵynda joq! Qala balansyna kirmegendikten, ahýal osy...  Jekeshelegen basshynyń munymen isi joq», - dep jazdy Raıhan Imahanbet.

Aıtýynsha, murajaı aınalasyn kezip júrgen maskúnemderdi sýretke túsirip alyp Almaly aýdanynyń ákimshiligine salyp, kómek suraǵan eken.

«Obaly neshik tazalatady, biraq bul "kartına" aptasyna 3-4 ret qaıtalanady. Mýzeıge kelýshilerdiń aldynda qysylyp... qyzaryp "ekilik" alǵan baladaı yńǵaısyz kúıge túsemiz.

Mýzeı gıdi Jansaıa Sman qor basshysyn qulaqtandyrsa, "demalyp" jatyr dep qysqa qaıyrǵan. 
Ult ustazynyń 125 jyldyǵyna oraı, 1998 jyly saltanatty túrde ashylǵan taǵylym-úıdiń taǵdyryna el basshylarynyń selsoq kózqarasy... jekeshelep alýshynyń josyqsyz jaýaby...
Ne isteý kerek???» - dep kúıindi murajaı dırektory.

Qazaq halqyna qyzmet etken, halqy úshin janyn pıda qylǵan Alash arysy Ahmet Baıtursynuly osy úıde turǵan. Dál osy baspanadan ony «halyq jaýy» atandyryp, otbasymen qosa qýyp shyqqan. Ult bastaýynda turǵan uly tulǵany keıingi urpaq tanyp-bilsin degen maqsatta búginde bul ǵımaratty aqyn atyndaǵy murajaıǵa aınaldyrǵan.

1988 jyly alashordashylar aqtalǵan tusta Baıtursynovtyń balalary men nemereleri Ahmettiń atyna qoǵamdyq qor quryp, aqynnyń bir kezderi turǵan úıin murajaıǵa aınaldyrýdy qolǵa alady. Alaıda bul isti júzege asyrý ońaıǵa soqpady. Sebebi, úı basqa bireýlerdiń menshigine ótken edi. Degenmen de, aqyn urpaqtarynyń bastamasy nátıjesiz qalmady. 1993 jyly Almaty qalasy, Kosmonavtov kóshesiniń boıyndaǵy nómiri 60-shy úıdi murajaıǵa aınaldyrý jóninde sheshim qabyldanady. Osylaısha, 1998 jyldyń 12 qyrkúıeginde qaıta jóndeý jumystarynan ótken murajaı-úıdiń saltanatty túrde ashylýy bolady. Sondaı-aq, Almaty qalasyndaǵy kóptegen kóshelerdiń ataýy ózgertilgen tusta ǵalymnyń úıi ornalasqan osy bir kóshe Baıtursynuly dep aýystyrylady.

Tórt bólmeden turatyn murajaıdaǵy eń úlken ári jaryq eki bólmede Baıtursynulynyń otbasyna jáne zamandas dostaryna qatysty qundy maǵlumattardyń túpnusqasy men kóshirmesi jáne bireń-sarań eksponattar bar. Al úshinshi tar ári qarańǵy bólmege sanaýly ǵana eksponat qoıylǵan eken. Munda Ahmet Baıtursynovtyń atý jazasyna kesiler aldynda túsken fotosýreti ilinip tur.

Gúlim Jaqan