Aqpannyń aýa-raıy aldamshy, bir kún betińnen sıpasa, bir kún shekeńnen shertedi, keshe jer beti maıraǵaıda-taıraǵaı bolyp erip osy men kóktem shyqty-aý dep edik, azanda appaq qar burqasyndap, qylyshyn súıregen qańtardyń qysy buryq-saryq kúı keship alǵanyn órip qalyń shapandy izdeı bastadyq. Sary mashınany borbaılap shaýyp júretin men sońǵy kezde bir jaqsy ádetke kóshtim, úıden kádimgi jumysqa kólikpen ketken adamdaı  jolǵa shyqtym, kórshilerim aldanady kólikpen ketti dep, eki shaqyrym jerdegi Vodnık yqsham aýdanyna sary tulpardy qańtaryp, qaptaǵan tanaýynan jel esken, júz elý teńgelik jeti adamdyq tyrtańbaıǵa minip vokzalǵa tartam. Ózińmen óziń alysyp, qalyń kepteliste joǵaltatyn ýaqytyńdy únemdeýge, kóshedegi aqsha jazatyn kameradan, ysqyryǵyn shalyp turǵan Maı qyzmetkerinen qutqaryp, túngi shala uıqynyń qalǵanyn tolyqtyrady ekensiń, qandaı keremet janarmaıǵa quıǵan tıynyń da qaltańda, solaı Almatyda taltańda...

Jetinshi adam bolyp esik túbinde esik ashyp-japqysh bala sıaqty zorǵa jaıǵastym, qytaılar jasaǵan qobdıdaı tar mashına tompańdap zýlap keledi, otyra sala esiń shyǵady, olarǵa qaıysyp tiresken keptelis múlde joq, jol shetindegi trotýarlardy taqymyna qysyp alyp júıtkı beredi, júıtkı beredi, ol jerdiń oı shuńqyryna dóń,alaǵy esh tımeıdi betinde ushady, qarsy betke shyǵyp quıyndaı zymyraýda olardyń kánigi ádeti, jol erkesi osylar, qalaǵan jerden qosylyp, qalaǵan jerden tumsyǵyn tyǵady, ol baıqustar jalǵa alǵan kólikteriniń kúindelikti josparyn oryndap, bala-shaǵasyna azyq aparý úshin janyn shúberekke túıip arly-berli tynbaı bezekteıdi....

Qalaǵa iline bere janymdaǵy tolyq deneli apa myń teńgesin shyǵaryp júrgizýshi orys jigitiniń qolyna ustatty, tuzdaı kózmen qıǵashtaı qaraǵan ol:

-Gde vy vyhodıte?

-Balam-aý, ala berseńshi. Qulaǵy shabandaý estise kerek.

- Gde vy vyhodıte?

-Balam-aý, ala berseńshi jol aqysy ǵoı.

-Apa ol kisi sizge qaı jerden túsesiz dep otyr.

-A...e... qaıda bolýshy edi, vokzalǵa baram.

-Júrgizýshi aldyna qarap tynyshtala qaldy.

-Janynda otyrǵan moınyn bura qarap, «Búgin kesh batqansha qar jaýady-aý deımin, balam».

-Apa, ony bir Alla biledi.

-Ana aýa-raıyn boljaıtyndar keshe telejáshikte solaı dep jatqan.

-Olardyki tek boljal ǵana, qazir adamdar Allanyń isine aralasyp alatyn bolǵan, naq shynyn Jaratýshy biledi, olardyń aıtqany keıde keledi, keıde múlde basqa.

-Durys aıtasyń balam.

-Apa myna sary jigit sizden qatty qorqyp ketti, qaıta-qaıta jany shyǵa «Gde vy vyhodıte»,-dep bezildep ketti, tipti aldyna qaraýǵa shamasy kelmeı ketti,  osylar áıelinen qatty qorqady-aý shamasy, eger men aqsha bersem olaı suramaıtyn edi.

-Ia, durys aıttyń balam, sen bir zerdeli bala ekensiń, bizdiń qoǵamnyń qasireti de osy.

-Siz shalyńyzdan qorqasyz ba?

-Qorqanny nesi, aldynan qıa ótpeımin, qazirdiń ózinde shaldyń ruqsaty men kele jatyrmyn.

-Nege sonsha qorqasyz?

-Men týarda sheshem baıqus bir áýlıeniń basyna baryp, Jaratqannan meni surapty. Meniń aldymda alty balasy shetinep ketken eken. Áýlıeniń basynda turǵanda kenetten sheshem qulap, ornynan tura almaı qalypty, shyraqshy aqsaqal «seniń qandaı kúnáń bar, aýyr bir kúná jasap júr ekensiń», - dep kiripiginiń astyna jasyrynǵan kózin asha ashýlanyp qaraǵan eken, sheshem baıqus dirildep men kúıeýime jıi ursamyn, boqtaımyn dep eńkildep jylaı bastapty, mine aýyr kúná, áıeldiń piri – ol eri, eriń rıza bolsa saǵan segiz jánattyń esigi ashyq, eki dúnıede senen baqytty jan joq, jyla qatty jyla kúnáń tógilsin, shynaıy táýbe et, ekinshi bul kúnány jysamaý týraly ant ish dep sustana aıtypty.

Mine, osy áńgimesin biz talaı estidik, sodan men týyp, artymnan úsh inim qatar ósipti. «Qyz bala jat jurttyq, basqa úıdiń tilekshisi bolasyń, birinshi jaryńdy jattaı syıla, túsken bosaǵańdy janyńdaı jaqsy kór, ol úıdiń bir tal qoqysy sen úshin qımas zattaı bolsyn, sonda sen baqytty bolasyń»,- dep es bilgennen mıymyzǵa quıyp tastaǵan dep sary kempir aǵynan aqtaryldy. Qazir Allaǵa shúkir 9 balam bar, nemere-shóbere ósip jatyr, apa taǵy bir áńgime kóshti.

«Osydan 5 jyl aldyn shalym 63-ke keldi, taı soıyp paıǵambar jasyn úıde erekshe qurmettep toıladyq. Eki jyldyń aldyna men de 63-ke keldim, shalyma qarap, balalaryma eskerttim. «Áı, kempir paıǵambarymyz  Muhammed(s.ǵ.ý) er adam bolǵan, sondyqtan saǵan bul jasty toılaýǵa bolmaıdy» dep eskertti, men birden óz ornymdy bilip tynysh qaldym.

Bizde, otbasynda shalymnyń aıtqany zań, ol ne dese biz esh qarsy turmaımyz, tamaqta odan buryn qol sozbaımyz, dastarhanda sonyń uzaq batasymen ornymyzdan turamyz.

Mende sóz joq tek estigenimdi ishime túıip, óz áıelimdi esime alyp Seıfýlın kóshesine jete únsiz kólikten túsip bara jattym...

Nurhalyq Abydraqyn