Nursultan Nazarbaev pen Qasym-Jomart Toqaev Vladımır Pýtınmen sóılesti, - dep habarlaıdy Qamshy.kz aqparat agenttigi Reseı prezıdentiniń baspasóz qyzmetine silteme jasap.

Vladımır Pýtın Qazaqstannyń Tuńǵysh Prezıdenti, Qaýipsizdik Keńesiniń tóraǵasy Nursultan  Nazarbaevpen jáne Qazaqstan Prezıdenti Qasym-Jomart Toqaevpen telefon arqyly sóıleskeni habarlandy.

"Vladımır Pýtın eki taraptyń odaqtastyq qatynasynyń damýyna jáne eýrazıalyq birlesý jobasynyń sátti júzege asýyna úlken úles qosqany úshin Nursultan Nazarbaevqa alǵys bildirdi. Qazaqstannyń Tuńǵysh Prezıdenti Eýrazıalyq ekonomıkalyq odaq aıasynda áriptestikti kúsheıtý boıynsha jumystarǵa belsendi qatysa beretinine senimdi ekenin aıtty", - dedi Kremldiń baspasóz qyzmeti.

Reseı prezıdenti Qasym-Jomart Toqaevty prezıdenttik qyzmetimen quttyqtap, oǵan sáttilik tiledi.

"Olar aldaǵy ýaqytta Reseı men Qazaqstannyń áriptestik baılanysynyń odan ári tyǵyz bolýyna jáne jaqyn arada Qasym-Jomart Toqaevtyń Reseı Federasıasyna issaparyn uıymdastyrýǵa kelisti", - dep habarlandy.

Usynǵan: Maqpal Sembaı