Álıhan Bókeıhan kóshesine baryp qaıtsańyz...

Búgin Almaty qalasyndaǵy Álıhan Bókeıhan atyndaǵy kóshege baryp qaıttym. Kósheniń basynan túsip qalyp, 3950 metr uzyndyqta jatqan kósheni jaıaý aralap shyqtym.

3950 metr degenge «jaqsy» demeńiz, jartysy jol, jartysyn aınalmaly kópirler alyp jatyr. Al kósheniń aty abyroı bolǵanda Álıhannyń atymen asqaqtap turmasa: «bul jerde ne bar?» degen suraqqa jaýap bere almas edim...

Jaıaý júrginshilerdiń jolymen júrip kelem. Shań-shań bolǵan aıaqqa qarap, Almatynyń joǵary jaǵynda asfáltpen júrip jatqandardy oıladym. Baqytty eken! Jol boıy kórgenim qıraǵan úıler. Ǵımarat salýǵa nemese «Esentaı» sekildi áınekten záýlim saraı turǵyzýǵa arlanǵan bolar. Onyń ústine qalanyń shet jaǵy: Jetisý aýdanynda ornalasqan. Raıymbek dańǵylynan bastap Soltústik aınalymǵa deıin sozylyp jatyr. Rysqulov dańǵylyn qıyp ótedi.

Ult kósemi «maǵan kóshe berińder!» dep suraǵan joq, alaıda halyq qurmettep kósheniń atyn bergen eken, oǵan da shúkir demesek, bul naǵyz uıat nárse! Kópir odan qala berdi aınalasynda demalatyn birde-bir orny joq kósheni Álıhan Bókeıhannyń atyna bere salǵansha, Bostandyq nemese Medeý aýdany jaqtaǵy shaǵyn bir kósheniń atyn ataı salǵan bek jaqsy edi. Kósheniń uzyndyǵymen de jarysatyn qoǵamǵa keldik qoı...

Sýrette kórip turǵandaryńyzdaı, kóshe ataýyna degen qurmet joq. Birinde «Bókeıhanov», birinde «Bokeıhanov», birinde atymen joq. Al bir sýrette kórip turǵandaı astyna: «byv.Aerodromnaıa» dep bergen. Tań qalatyn eshteńesi joq, taksı kókelerge «Naýryzbaı batyrdy» úsh ret aıtyp artynan amalsyz «Dzerjınskıı» deımiz.

Kósheniń shańyn turǵan kólikterden-aq kórýge bolady. Jalpy Ult kósemi kezinde kólik shyǵaratyn zavod ashqan adamdaı este qala ma deısiń... Sebebi, kósheniń eki jaq boıy tolǵan STO. Kólik jóndeıtin jerlerden kóz alyp júrý múmkin emes. Kórip turǵandaryńyzdaı «Nýr STO» da bar.

Anaý sýrettegi osy kósheniń boıyndaǵy shaǵyn ájethananyń kórinisi.

Tımırázev kóshesinen bastap ózgertý jasaǵan qala ákimi Baýyrjan Báıbek myrza, osy bir Ult kósemine berilgen kósheni kógaldandyrýǵa, aınalasyn jasaýǵa jáne demalys oryndaryn da (saıabaq) ashýǵa kóńil bólse deısiń. Deısiń-deısiń...

Aıtpaqtaı, Astanada... oı, Nur-Sultan qalasynda meshit salý týraly shýlap edik qoı. Mynaý Álıhan Bókeıhan kóshesiniń boıyndaǵy «Amın» meshiti. Jetisý aýdanyna qarasty eken...

Alash úshin «ant» etip, Alash úshin ólip ketken Álıhan Bókeıhanǵa degen qurmet osy bolsa, jetisken ekenbiz. Ótkenińdi ulyqtaý, ótkenińe úńilý, olardyń erligi týraly urpaqqa jetkizý paryz deımiz ǵoı. Erteń balańdy ertip osy kóshe boıymen júrip jatsań: «balam, mynaý Álıhan atańnyń kóshesi» dep qaıtyp aıtasyń?!

Bas-basyna eskertkish salatyn, tipti jeke rýyna kóshe berip, odan qala berdi rýyna degen qurmetin kól-kósir baılyqpen eseptep jatatyn kásipker myrzalar! Myna turǵan Almatydaǵy kósheniń boıyn jasaýǵa sizder de at salysyp jiberseńizder. Álıhan «rýym» dep ólgen joq «alashym» dep ólgen. Aqyry joǵary jaqtan kóshe bere almaıdy ekenbiz, bar kósheni gúldendirip jibersek nesi jaman?! Eń aqyry árýaǵy razy bolmaı ma!

Marǵulan Aqannyń feısbýk paraqshasynan alynǵan

Usynǵan: Ásel Bolatqyzy