Elbasy, "NurOtan" partıasynyń tóraǵasy N.N.Nazarbaevqa,

"NurOtan" partıasy tóraǵasynyń orynbasary B.Q.Baıbekke,

QR Premer-mınıstri K. Másimovke,

Bas prokýror A.Daýylbaevqa,

Qarjy mınıstri B.T. Sultanovqa,

Májilis depýtattary:

R.Halmuradovqa,

N.Sabılánovqa,

O.Asanqyzyna,

M.Begentaevke,

Táýelsiz BAQ ókilderine,

jáne  qazaq tili qoldanystan múlde shyǵyp jatqanyna alańdaýshy halyqqa

Men, Beısenbaı tegi R.Z., jobalaý salasyndaǵy jeke kásipkermin. Byltyr memlekettik satyp alýlarǵa qatysam dep, memlekettik satyp alý portalynan qazaq tildi aqparat ala almaýym sebepti uzaq «soǵystyń», Prezıdentten bastap búkil respýblıkaǵa jarıa etem degen "shantajdyń" arqasynda ǵana qatysa aldym.

Maǵan da kúnkóris kerek. Biraq, barsha qazaq kúnkóris dep, ana tilimizdi, memleket tildi shettetkendikten osyndaı qorlyq, kúlkili jaǵdaıda otyrmyz ǵoı!

Ótken aptada, memlekettik satyp alýǵa qatyspaq bolǵanymda, saıttan qazaq tilinde 3 kún málimet ala almadym. Ne qazaqsha paraqshasy istemeıdi, ýlatyp - shýlatyp (jáı, memlekettik satyp-alýlarda memleket tili turýy kerek, jáne birinshi turýy kerek degenge eshkim qulaq aspaıdy) ony istetkenimshe, tehnıkalyq qoldaý qyzmeti, Astana qalasy 72-90-90 telefondaǵy qyzmetiniń tek qana orys tilindegi avtootvechıgi turǵany bylaı tursyn, telefondy  alatyn operator mindetti túrde: «Zdrastvýıte, ... slýshaet, chem mogý pomoch?» deıdi. Qazaq tiliniń ıisi de ańqymaıdy! Qazaq tildi operatorǵa qos deseń, taǵy 15-20 mınýttaı tosýyń kerek. Óıtkeni olardyń aıtýynsha qazaq tildi operatorlar az! Olardyń reglamenti boıynsha, keshirińizder, «bismillási» orysshadan bastalýy kerek! Aıtpaqshy orys tilinde «Vash zvonok, ochen vajen dlá nas, vremá vashego ojıdanıa 31 mınýta!» degen avtootvechık sarynyn, ústine 7-10 mınýttaı qosylatyn ústememen tyńdaısyń! 10-shaqty ret qońyraýlatqanymda, eń az bergen ýaqyty 15 mın. boldy. Árıne, ol da qosymsha ýaqytpen. Múmkin osylaısha bizdiń ýaqytymyzdan (tehnıkalyq kómek kórsetetin jumyskerlerdi kóbeıtpeý arqyly) kompanıa ekonomıa da jasap otyr...

Memlekettik satyp alýlardaǵy tehnıkalyq kómek, bilýimshe Qarjy mınıstrligimen kelisim-shart arqyly jasalady. Sonda atalmysh mınıstrlikke (estýimshe buǵan jaýapty Bahmýtova hanym) qazaq tildi mıkrobıznesti (mynda qandaı bıznes ekeni mándi de emes) tuqyrtý, ony konkýrstarǵa qatystyrmaý maqsat pa? Bolmasa nelikten osyndaı masqara kompanıamen kelisimge otyrǵan? Byltyr da osy jóninde birneshe ret mınıstrlikke de, bas prokýratýraǵa da telefon shalǵanmyn.

Byltyrdan beri túzetýge bolar edi ǵoı! Byltyr, bas prokýratýranyń bıznesti qoldaý jónindegi strýktýrasynda qazaq tildi adam otyrǵan. Bıyl eldegi zańdardyń durys atqarýylýyn qadaǵalaıtyn bas prokýratýra ókili Adılbekov myrzadan mynadaı jaýap aldym(tel:30-18-23):«Slýshaıý» dep bastap, «men qazaqpyn» degen sózime oryssha: «Kto takaıa, predstavtes»  dedi. 71-25-85, 77-31-11, 71-26-20 bas prokýratýranyń men qońyraýlatqan osy telefondaryn kótergender tek kórshi memlekettiń memlekettik tilinde jaýap berip otyrdy: «Slýshaıý vas», «Prıemnaıa», t.s.s. Keıbirýleri ǵana: «Biz bilmeımiz ǵoı, kim qońyraý shalyp turǵanyn, sondyqtan oryssha aıtamyz» deıdi.

Mynda Konstıtýsıadan bastap, tilge qatysty zańdar 100 paıyz buzylyp otyrǵanyn aıtpaǵanda, ǵasyrlar boıy (sońǵy 300 jyl) qazaq tiliniń tuqyrtylýyna qarsy turǵan, ár kezdegi el basynda bolǵan tulǵalarynyń jurnaǵy da joq pa el bıliginde? Sizderge orys tiline soǵys ashyńdar degen eshkim joq! Biraq qazaq tilin zań boıynsha paıdalanýlaryńyzdy talap etemin!

Jazǵandaryma baılanysty dáleldeme skındar, aýdıojazbalar qolymda bar.

Jalǵasy: hattyń jazylý barysynda belgili bolǵandaı, memlekettik satyp alýlar saıtyna, konkýrstyń kody men ataýyn Samuryq-Qazyna kompanıasy qoıady eken. Atalmysh kompanıa solardy (memlekettik satyp alýlar saıtynyń qazaqshasyna) ataýlarymen kodyn oryssha qoıǵan. Bular nege buaı istep jatyr dep, baılanysqa shyqpaqshy bolyp, SK.KZ Samuryq-Qazyna kompanıasynyń saıtyna kirdim. Qazaq tilindegi aqparat turmaq oǵan silteme de joq!

Barshamyz biletindeı, osy kompanıanyń basshysy, qatelespesem -T.Kýlıbaev. Qurmetti Elbasy, siz ár saıtqa kire bermeıtin shyǵarsyz. Degenmen Qazaqstan memleketiniń qazynasy shoǵyrlanǵan úlken kompanıanyń basynda otyryp, memleket tiline oryn qaldyrmaǵan «Samuryq-qazynanyń» saıtyna bir qarańyzshy...  Estýimshe kompanıa óz jumysyn tolyǵymen orys tilinde júrgizedi. Sonda bul mekeme Ata zańǵa, QR Tilder týraly zańyna pysqyrmaıtyn bolǵany ma? Álde mekeme basshysy kórshi memlekettiń lobbıi me?