Senbi kúni apatqa ushyraǵan «Vıkıng Skaı» krýız laıneri Molde aılaǵyna kelip jetti, dep habarlaıdy Qamshy.kz aqparat agenttigi ♦inform.kz saıtyna silteme jasap. 

Keme ekıpajynyń músheleri daýyl kezinde aıaq astynan isten shyqqan keme qozǵaltqyshyn óz kúshimen jóndeýdi bir sátke de toqtatqan joq. Sóıtip olar qozǵaltqyshty ishinara otaldyryp, býksır katerleriniń kómegimen Molde jaǵalaýyna jetip jyǵyldy.

Eske sala keteıik, evakýasıa jumystary túni boıy jalǵasty. Tolqyndardyń bıiktigi úsh qabatty úıdiń bıiktigimen birdeı boldy. Krýız laıneriniń jolaýshylaryn tikushaqpen tasymaldaýǵa týra keldi. Tótenshe jaǵdaı kezinde kóp adamnyń boıyn qorqynysh bılep, buryn mundaı jaǵdaıdy kórmegendikten qatty úreılengenderin jasyra almady.  

Nátıjesinde 463 adam áýe tasymaly arqyly jaǵalaýǵa jetkizildi. Negizi keme bortynda ekıpajdy qosqanda barlyǵy 1373 jolaýshy bolatyn.  Sonymen qatar, ekıpaj músheleri arasynda Qazaqstannyń eki azamatshasy bar bolyp shyqty. Bul aqparatty Qazaqstannyń Norvegıadaǵy elshiligi de rastady. Elshiliktiń málimetinshe, bul másele bizdiń dıplomatıalyq mısıanyń erekshe baqylaýynda.

«Vıkıng Skaı» bortyndaǵy bizdiń eki azamatsha oqys oqıǵadan keıin úırenshikti rejımde jumysyn jalǵastyrǵan. Olar bizden kómek suraǵan joq», - dedi elimizdiń Oslodaǵy konsýly Azat Mátenov.

Onyń sózinshe, dıplomattar oqıǵa týraly estı salysymen birden jergilikti bılik ókilderine habarlasqan.    Qazirgi ýaqytta alańdaıtyn eshteńe joq. «Vıkıng Skaı» jolaýshylary men ekıpajy jergilikti qonaq úıge jetkizilgen. Ol jerde barlyǵyna tıisti kómek kórsetiledi.  

Usynǵan: Maqpal Sembaı