Amerıkandyq jazýshy ári ǵalym Maıkl Hart adamzat tarıhyndaǵy álemniń eń uly júz adamyn ulylyq dárejelerine qaraı iriktep olar týraly kitap jazýdy oılastyrady. Olardy tańdaý barysynda túrli áserlerge berilmeı jan-jaqty bolý úshin Maıkl Hart pen onyń serikteri kompúterdi qoldanady. Kompúterge ulylardyń atqarǵan isteri, alǵa qoıǵan maqsattary erekshe qasıetteri, aıryqsha qabiletteri, jetken nátıjeleri men adamzat tarıhyna yqpal-áseri sekildi barlyq maǵlumattar salynady. Ol úshin biraz ter tógýge týra keledi. Nátıjesinde kompúter tarıhta aıtarlyqtaı iz qaldyrǵan júz adamdy tańdap alady. Endi kompúter ulylardyń ulysyn tabýǵa tıis bolady. M.Hart erekshe tolqynyspen kompúter núktesin basady, ekranǵa "Muhammed paıǵambar" degen jazý shyǵady. Bul Hart pen onyń áriptesterin qolaısyz jaǵdaıǵa túsiredi. Olar bir jerden qatelik ketken shyǵar degen oımen qaıta saraptaý jumystaryn júrgizedi. Kompúter aınasyna "Muhammed paıǵambar" degen jazý qaıta shyǵady. Buǵan qanaǵattanbaǵan Hart pen áriptesteri tekserý jumystaryn birneshe márte qaıtalaıdy. Biraq kompúter qasarysyp aıtqanynan qaıtpaıdy. Ǵalymdardyń muny moıyndaǵannan basqa amaldary qalmaıdy. Saraptaý nátıjesinde M.Hart "Tarıhtaǵy júz adam" degen belgili eńbegin jazyp shyǵady. Kitapta ulylar tizimi bizdiń Paıǵambarymyz Muhammedten, salla Alla aleıhý ýá sálam, bastalady. Kitap AQSH-ta basylyp shyǵady. Endi osy kitaptan shaǵyn úzindiler keltireıik. "Meniń álemniń eń yqpaldy adamdarynyń tizimin Muhammedten bastaýym oqyrmandardy tańdandyrýy jáne olardyń kelispeýshiligin týǵyzýy múmkin. Alaıda adamzat tarıhynda din jáne dúnıe isinde ǵajaıyp tabysqa jetken jalǵyz sol ǵana. ...Qazir onyń dúnıe salǵanyna on tórt ǵasyr ótse de onyń álemge eter yqpaly óte zor".