Qymbatty Otandastar!
Búgin elimizge jáne árqaısymyzǵa qatysty asa mańyzdy Úndeý jarıalap otyrmyn.
Elimizdiń Konstıtýsıasyna sáıkes Qazaqstan Respýblıkasy Prezıdentiniń kezekten tys saılaýyn 2019 jyldyń 9 maýsymynda ótkizý týraly sheshim qabyldadym.
Men bul jaýapty sheshim boıynsha Elbasymyz Nursultan Ábishuly Nazarbaevpen aqyldastym.
Parlamenttiń qos palata spıkerimen, Premer-Mınıstrmen keńestim.
Konstıtýsıalyq Keńestiń kelisimine júgindim.
Parlamenttegi partıa jetekshilerimen kezdestim.
Kezekten tys saılaý týraly sheshim qabyldaý – óte mańyzdy ári qajetti qadam.
Biz Elbasymyzdyń arqasynda táýelsiz, qýatty memleket qurdyq. Qazaqstan halyqaralyq júıede ózine laıyqty ornyn aldy. Bizdi yqpaldy jáne beldi memleket retinde búkil álem moıyndaıdy.
Qazirgi tańda tarıhı kezeńdi bastan ótkerip otyrmyz.
Joǵary bılik zańdy jáne beıbit jolmen aýysty. Búkil álem qoǵamdastyǵy osy oqıǵany túsinistikpen jáne qurmetpen qabyldady.
Memleket basshysy retinde men ózimniń mindetimdi jáne jaýapkershiligimdi tereń sezinemin.
Prezıdent laýazymyna kiriskennen bastap óńirlerdi aralap júrmin. Halyqtyń kóńil-kúıin jaqsy bilemin. Zıaly qaýymmen, eńbek ujymdarymen, bıznes ókilderimen, ınvestorlarmen, halyqaralyq tulǵalarmen kezdestim.
Biz Elbasynyń sara jolymen júremiz. Halqymyz – birtutas. Táýelsizdigimizdiń eń joǵary qundylyǵy retinde memleketimizdiń irgesi myǵym. Aldaǵy Prezıdent saılaýy osyǵan dálel bolýy kerek.
Sondyqtan, eldegi qoǵamdyq-saıası kelisimdi qamtamasyz etip, alǵa basý úshin, áleýmettik-ekonomıkalyq maqsat-mindetterdi laıyqty júzege asyrý úshin bizge aıqyndyq qajet. Onyń ústine, álemdegi ahýal bulyńǵyr bolyp tur. Bul Otanymyzdyń qaýipsizdigine syn-qater ákelýi múmkin.
İshki jáne syrtqy saıasattaǵy sabaqtastyq pen turaqtylyqty saqtap, Elbasy usynǵan áleýmettik baǵdarlamalardy oıdaǵydaı sátti ári tıimdi iske asyrýymyz kerek.
Ol úshin atalǵan taǵdyrly sheshimdi qabyldadym.
Mundaı sheshim tek halyqtyń tikeleı erkimen saılaýda qabyldanýy qajet.
Qazaqstan – demokratıalyq memleket. Prezıdent halyqtyń tańdaýymen saılanady.
Men, Memleket basshysy retinde, saılaýdyń taza, ashyq ári ádil ótýine kepildik beremin! Bul – meniń berik ustanymym!
Aldymyzda zor mindetter tur. Men halqymyzǵa, ıaǵnı Sizderge senemin.
Qadirli Otandastar!
«Altaý ala bolsa, aýyzdaǵy ketedi, tórteý túgel bolsa, tóbedegi keledi» deıdi dana halqymyz.
Aldaǵy saılaýǵa barshańyzdy barynsha jaýapkershilikpen qaraýǵa shaqyramyn.
Elimizdiń keleshegi, ár otbasy men ár azamattyń taǵdyry Sizderdiń sheshimderińizge tikeleı baılanysty!
