Qazaqstan Respýblıkasynyń Prezıdenti Qasym-Jomart Toqaev búgin halyqqa úndeý jarıalap, ústimizdegi jyldyń 9-maýsymynda kezekten tys prezıdent saılaýy ótetinin málimdedi.
Ol mundaı sheshimge elimizdiń demokratıalyq baǵytta ekenin, halyq óz basshysyn ózi tańdaý qajettigin eskerip kelgen. Sondaı-aq, prezıdent sheshim qabyldamas buryn birqatar partıa basshylarymen jáne Konstıtýsıalyq Keńestiń tóraǵasy, Elbasy Nursultan Nazarbaevpen aqyldasqan.
Úndeýden keıingi kez-kelgen adamnyń sanasynda kelesi suraqtar týyndaǵany anyq: «Saılaýǵa kim túsedi?», «Toqaev orynyn saqtap qalýǵa tyrysa ma?», «Saılaý qanshalyqty ádil ótedi?».
Bul suraqtardyń barlyǵynyń jaýaby bulyńǵyr. Desek te, Qasym-Jomart Kemelulynyń bergen ýádesine súıensek, saılaý barynsha adal ótpek. Qup!
Saılaýǵa qatysatyn úmitkerlerdiń qatarynda Toqaevqa básekeles bola alatyn kim bar ekeni kúlli qazaqty qyzyqtyryp otyrǵany ras. Sońǵy ýaqyttarda áleýmettik jelilerde arnaıy paraqshalar ashylyp, belgisiz adam daýysy Dosmuhammed Kóshimovtyń kandıdatýrasyn úgittep jatqanyn baıqadyq. «Shaban úırek buryn ushadynyń» keri. Soǵan qaraǵanda, kezekten tys saılaýǵa Dos Kóshimniń at qosyp qalýy ǵajap emes.
Ózge úmitkerler týraly boljam jasaýdyń ózi qıyn. Degenmen, búgingi úndeý oń jambasyna kelip, qolyn ysqylap otyrǵan úmitkerlerdiń bar ekeni anyq.
Saıasatker, «Jańa Qazaqstan» forýmynyń ókili Ámirjan Qosanov ta Elbasy ókilettiligin toqtatqannan keıingi jýrnalıser suraǵyna «El qoldap jatsa nege túspeske? Men daıynmyn» dep jaýap bergen. Taǵy bir saýsaǵyńyzdy búge berińiz.
Al «Aýyl» partıasy prezıdent saılaýyna úmitker usyný josparlarynda joq ekenin kesip aıtty. Al «Aq Jol» partıasynyń jetekshisi Azat Perýashev bosqa aqsha shashý úshin emes, tek nátıje bolsa ǵana úmitker usyný qajet ekenin aıtyp, jalpylama jaýap bergen. «Ógizdi óltirmeıdi, arbany syndyrmaıdy».
Jalpyulttyq sosıal-demokratıalyq partıasynyń ókilderi báıgege úmitker qosý máselesin aldaǵy ýaqytta tereńirek talqylap baryp, sheshim qabyldaıtyndaryn jetkizgen.
Demek, aıǵa jýyq ýaqyt bılikti ýystaǵan Qasym-Jomart Kemelulynyń bul saılaýdaǵy múmkindigi joǵary. Onyń ústine halyqaralyq saıası arenada tájirıbesi bar saıasatkerdiń bılik basynda bolýyn halyq ta qup kóretin sekildi.
2020 jyldyń sáýirine deıin sozylatyn ókilettiligin bir aı óter-ótpeste kezekten tys saılaýǵa salý sheshimine kelýi de prezıdent Toqaevtyń senimdiligin kórsetip beredi.
Ádilet Mádenıet
