Qazaqstandyq aralas jekpe-jek maıtalmany Sultan Joldasbekov Qyrǵyzstanda ótken týrnırde tájikstandyq álem chempıonyn nokaýtpen jeńdi dep habarlaıdy Qamshy.kz aqparat agenttigi Qsport.kz portalyna silteme jasap.

Sultan Joldasbekov Qyrǵyzstanda ótken «Batyr-Bashy 4» týrnırinde tájikstandyq Mahmadúnýs Olımzodamen jekpe-jekke shyǵyp, ekinshi raýndta tehnıkalyq nokaýtpen jeńiske jetti.

Otandasymyz áý basta jergilikti sportshy Tılek ýýlý Kaparmen (3-0-0) jekpe-jek ótkizý kerek edi. Alaıda ol jaraqatyna baılanysty kezdesýge shyǵa almaǵandyqtan taǵy da qyrǵyz sportshysy Myktybek Oskonbaev (5-1-0) qarsylas atanady. Biraq ol da jarysqa eki kún qalǵanda jaraqat alyp, taǵy qarsylasy aýysqan.

Kez-kelgen qarsylaspen shyǵýǵa kelisken Sultanǵa Nýrbaı ýýlý Kaıratty (5-1-0) qoıady. Bir qyzyǵy, úshinshi qarsylasy da jekpe-jek bolatyn kúni jaraqat alyp, jekpe-jekten bas tartady. Aqyry Nomad MMA-dan álem chempıony bolǵan Mahmadúnýs Olımzodaǵa qarsy jekpe-jekke shyǵýǵa bel baılaıdy. Osylaısha, otandasymyz tájikstandyq, tájirıbeli qarsylasyn 2 raýndta joıqyn soqqylarynyń astyna alyp, tehnıkalyq nokaýtpen jeńiske jetedi. 

Aıta keteıik, Sultan Joldasbekov «Tahtaı» klýbynyń múshesi.

Usynǵan: Maqpal Sembaı