Qysqartýǵa kóp jaǵdaıda óte talantty adamdar ushyraıdy. Olardyń jumystan qýylýyna sebep – qyzmetin nashar atqarǵandyqtan emes, jaı ǵana kóralmaýshylyqtar nemese shekten tys qysym.
Desek te, birqatar jumys berýshiler mundaı kadrlardan boıyn aýlaq ustaýǵa tyrysady. Ári qaraı paraqtasańyz, ne úshin qyzmetten qýylǵan mamandy jumysqa alý kerektiginiń birneshe sebepterin aıtyp beremiz.
Olar birden jumysqa kirisýge daıyn turady
Qazirgi ýaqytta mamandardyń basym bóligi eki nemese úsh jumysty qatar jasaı beredi. Jańa jumysqa kiriskende, negizgi jumysynyń sharýalaryna alańdap, berilip kete almaıdy. Sondaı-aq, ol jaqta áli aıaqtalmaǵan jobalary nemese qolyna tımegen jalaqysy bolsa, máseleni odan ári shıelenistire túspek.
Al qysqartýǵa ushyraǵan nemese jumysynan qýylǵan azamattar dereý jańa oryn tabýǵa belsendi kirisedi. Olar jańa qyzmetine bir-eki kúnniń ishinde aralasyp ketýge daıar. Óıtkeni, olardyń aıaqtaýy tıis sharýalary men burynǵy jumys orynynda jaýapkershilikteri joq.
Olardyń kúshi tasyp turady
Eger úmitkerdiń jumysqa degen qyzyǵýshylyǵy tómengi deńgeıde bolsa, onyń jańa ortaǵa sińip ketýi birqatar qıyndyqtar týǵyzýy ábden múmkin. Sebebi, olarda qalyptasyp qalǵan ortasyn, turaqty jalaqysyn qımaý, eski kúnderdi ańsaý sekildi sezimder basymyraq bolady. Bundaı tıptegi mamandardyń jigerin janyp, barynsha janaryna ot berý shart.
Al jumystan qýylǵan qyzmetkerlerdiń kópshiligi ózderiniń mansap joldarynyń jańa baǵytqa aýysqanyn sezinip, sol baǵytta ózin dáleldeýge tyrysady. Jańa jumysshynyń sizdiń kásibińiz úshin tyrysqany - aqshaǵa satyp ala almaıtyn qundylyq. Óıtkeni, ol básekelestik týǵyzady, ol komandany alǵa súıreıdi.
Olar erekshe ortaǵa barǵysy keledi
Qyzmetkerler keı jaǵdaıda ishki atmosfera jóndi bolmaǵandyqtan, ózderiniń potensıalyn tolyǵymen kórsetýge múmkindik ala almaıdy. Sol sebepti onyń jumysy avtomatty túrde nashar halde bolady. Keıin barlyǵy belgili... ol jumystan qýylyp tynǵan.
Endigi jańa jumysynda ol óziniń qoly jetpegen ishki atmosferany izdeıdi. Siz jumys berýshi retinde áńgime barysynda kompanıanyń aýrasy jaıly, qyzmetkerlerdiń qarym-qatynasy jaıly aıtýdy umytpańyz.
Olardyń birqatary ýaqytsha jumys izdeıdi
Keı jaǵdaılarda jumystan qýylǵan qyzmetkerler tamasha tabys kózin nemese qomaqty qarajat taýyp alady. Olar endigi ýaqytta tómengi jalaqy men turaqty jumysqa qyzyǵýshylyq tanyta qoımas. Degenmen, súıegine sińip ketken ádetinen arylǵansha, qosymsha retinde jumys izdeýi múmkin.
Eger sizge belgili bir maman ýaqytsha merzimge qajet bolsa, osy sanattan qarastyrǵanyńyz abzal.
Qysqarǵan qyzmetkerler – ashylmaǵan talanttar
Ózderińizge málim, kompanıa ishindegi qysqartý naýqanyna jumysyn, jaýapkershiligin jóndi ıgerip kete almaǵan qyzmetkerler iligedi.
Al olar alǵashqy qadamdaryn endi ǵana jasaǵan bolsa she? Onda olardyń boıynda buqqan talanty bary anyq. Bálkim, sizdiń kompanıańyzdaǵy mansabynda jas qyzmetkerdiń jańa talanty jarq ete túser?
