Astanada «Joǵary tehnologıalyq sáýlemen emdeý terapıasynyń ózekti máseleleri» atty halyqaralyq ǵylymı-tájirıbelik konferensıa ótip jatyr. Konferensıaǵa otandyq onkolog, radıologtar, medısına qyzmetkerleri jáne arnaıy shetelden kelgen sarapshylar qatysty. Olar qazaqstandyq mamandarmen tájirıbe bólisýde. Sondaı-aq, jıyn barysynda onkologıalyq kómekti arttyrýdyń 2016-2020 jyldarǵa arnalǵan «Salamatty Qazaqstan» baǵdarlamasynyń jobasyn tanystyrdy.
Bul jıynnyń negizgi maqsaty – medısınalyq qyzmetkerlerdi memleket qarjysyna satyp alynǵan joǵary tehnologıalyq sáýlemen emdeý apparatymen jumys isteýdi úıretý, tájirıbe almasý alańyn qalyptastyrý. Bastysy mamandardyń kásibı deńgeıin kóterý bolyp sanalady. Sebebi, bilikti dáriger ǵana naýqasqa tolyqqandy túrde kómektese alady. Aıta keteıik, elimizde 4 joǵary tehnologıalyq jyldamdatqysh Astana, Aqtóbe, Semeı, Almaty qalalarynda ornalasqan. Oǵan qosa, 7 standarttyq qurylymdaǵy jyldamdatqyshtar Astana, Qaraǵandy, Almaty, Óskemen, Oral qalalarynda bar.
Otandyq onkologıa memlekettik qoldaýdyń arqasynda qaterli isikpen kúresýdiń jańa deńgeıine kóterildi. Memleket satyp alǵan «TrueBeam» joǵary tehnologıalyq jelilik jyldamdatqyshy ekiólshemdi sáýleli terapıanyń úshólshemdi konformaldyq túrine ótýge múmkindik berdi. Bul sáýleli emdeý terapıasynda eń úlken jetistik, ózgeris retinde baǵalandy. Osy tusta medısınalyq tehnologıalar men júıeni bes saýsaǵyndaı biletin kásibı mamandar úlken mańyzǵa ıe. Sondyqtan, sheteldik mamandarmen tyǵyz qarym-qatynas ornatý basty orynǵa qoıyldy. Búgingi bas qosýda sheteldik sarapshylar qazaqstandyq radıologtarǵa dáris oqyp, arnaıy sabaqtar ótkizdi. Sondaı-aq, sheteldik qonaqtar joǵary tehnologıalyq apparattar týraly bilimin de ortaǵa salady. İs júzinde jelilik apparattarmen qalaı jumys isteý keregin kórsetedi.
Konferensıaǵa qatysqan QR Densaýlyq saqtaý jáne áleýmettik damý mınıstrligi medısınalyq kómekti uıymdastyrý departamentiniń dırektory Gúlnar Qulqaeva: «Onkologıalyq aýrýlar joǵary deńgeıde turǵandyqtan onkologıalyq kómekti arttyrý ýaqyt kúttirmeıtin máselege aınaldy. Sondyqtan da, 2016-2020 jyldarǵa arnalǵan baǵdarlamany bekitti. Buǵan deıingi «Salamatty Qazaqstan» baǵdarlamasy boıynsha bastalǵan is jalǵasa bermek. Buryn qaterli isikti erte satysynda anyqtaý men zamanaýı qurylǵylardy engizý máseleleri aldyńǵy qatarly orynǵa qoıdyq. Endi aldaǵy ýaqytta osy ister jalǵasyn tabady. Mamandar biliktiligin arttyrýǵa basa mán bermekpiz. Sonymen qatar, zamanaýı jyldamdatqyshtar sanyn kóbeıtý de josparda bar»,- deıdi.
Al Qazaq onkologıa jáne radıologıa ǴZI dırektory Qýanysh Nurǵazıev «Onkologıa salasynda qazir Elbasy da, Úkimet te kóp kóńil bólip jatyr. 2012 jyldan beri jańa tehnologıalardy engizip, medısınalyq kómekti kóterý úshin kóp jumystar jasaldy. Baǵdarlama aıasynda byltyr jeltoqsanda 4 sáýlemen emdeý jelilik jyldamdatqyshy ornatyldy. Al búgingi konferensıa mamandarymyzdyń biliktiligin arttyrýǵa keldi. Shetelden 5 dárisker keldi. Olarǵa arnaıy úıretý sabaqtary josparlanǵan» degen oıymen bólisti.
ANYQTAMA
Resmı málimetterge súıensek, 2015 jyldyń 1-qańtaryndaǵy esep boıynsha 150 436 qazaqstandyq onkoaýrýlar boıynsha esepte tur. 2013 jyly bul kórsetkish 146 404 bolǵan edi. Qaterli dertke shaldyqqandar sanynyń kóbeıýi obyrdy alǵashqy satysynda anyqtaý múmkindiginiń artýymen tikeleı baılanysty. Jyl saıyn qaterli isikten 17000 myń adam kóz jumady. Ólim-jitim boıynsha onkologıalyq aýrýlar ekinshi orynda tur. Elbasymyz Nursultan Nazarbaev otandyq onkologıanyń damýyna kóp kóńil bólip keledi. 2011-2015 jyldarǵa arnalǵan QR densaýlyq saqtaý salasyn arttyrýdyń «Salamatty Qazaqstan» baǵdarlamasy boıynsha dıagnostıkanyń joǵary tehnologıalyq ádisteri men ǵylymı negizde emdeý júıesi júzege asyrylyp, turǵyndardyń qoljetimdiligi artty.
