21 sáýir kúni Ýkraınada prezıdenttik saılaý ótedi. Qazirdiń ózinde munda alapat aqparattyq maıdan júrip jatyr. Kim jeńedi? Vladımır Zelenskıı me, joq álde qazirgi prezıdent Petr Poroshenko ma? Sońǵy zertteý qorytyndysyna nazar aýdarar bolsaq, alaman báıgede Zelenskııdi aty ozatynyn saýalnama qorytyndysy ańǵartyp-aq turǵandaı.

 «Reıtıń» áleýmettik tobynyń saýalnamasyna zer salar bolsaq, ýkraındyqtardyń jartysynan astamy shoýmen jigitke daýys  beretin sıaqty. Saýalnamaǵa qatysqandardyń 19 paıyzy Poroshenkoǵa daýys berýi múmkin, al 7 paıyzy prezıdenttik saılaýǵa barýdan bas tartatynyn málim etken. Sonymen, «alaman báıgede aty ozady» delinip otyrǵan Vladımır Zelenskııge halyqtyń 73 paıyzy daýys bermek. Sarapshylardyń aıtýyna qaraǵanda, bul jolǵy saılaýǵa halyqtyń 80 paıyzy qatysýy yqtımal. Sondaı-aq olar Ýkraınanyń batysy men shyǵys bóligi, ońtústik pen ortalyq aýdandary Zelenskııdi tolyq qoldaıdy degen pikirde. Al Ýkraınanyń batysynda halyq tańdaýy ıtjyǵys túsýi yqtımal. Saılaýshylardyń jas erekshiligine qatysty aıtar bolsaq, shoýmen jigitti qoldaýshylardyń qatary basym.

Birinshi, ekinshi týrda Vladımır Zelenskııden eki ese  artyq aqsha jumsamaq bolyp otyrǵan Petr Poroshenko shyn máninde jeńiliske ushyraı ma? Múmkin.

Endi birneshe kúnnen keıin Ýkraınada prezıdenttik saılaý bastalady.  Oǵan deıin neshe túrli boljamdar jarıalanady. Keıbir sarapshylar «Prezıdenttik saılaýǵa eń sońǵy núkte 19 sáýir kúni qoıylady» dep boljap otyr. Óıtkeni osy kúni prezıdenttikke úmitker Vladımır Zelenskıı men Petr Poroshenko «Olımpııskıı» stadıonynda halyqtyń  aldyna shyǵady. Munda sóz saıysynda kim jeńedi, 21 sáýir kúngi saılaýda sol úmitkerdiń  bási joǵary turýy múmkin.

Alaıda jeńisti Zelenskııge berip qoıǵandar bar. Bul senimdi de shyǵar. Durys ta shyǵar. Vladımır Zelenskıı qazirdiń ózinde kimdi qaı laýazymǵa  taǵaıyndaıtynyn aıtty. Demek, komandasyn jasaqtady degen sóz. «Bılikke menimen birge kásibı myqty mamandar men aqyldylar keledi»,– dedi ol.

Al birqatar sarapshylar «prezıdent Poroshenko bul saılaýda utylady da, kelesi parlamenttik saılaýǵa daıyndalady» degendi de aıtyp otyr. Sondyqtan ol bolashaqtaǵy parlamenttik saılaýda basym daýysqa ıe bolady da,  premer-mınıstrlikke keledi. Biraq bul qanshalyqty aqıqatqa jaqyn? Ony ýaqyt kórsetedi. Al bizdiń qazaqstandyq sarapshylardyń basym kópshiligi «bılik basyna Qazaqstan úshin Petr Poroshenkonyń kelgeni tıimdi. Óıtkeni qazirgi ýaqytta ol Vladımır Pýtınniń bıligin barynsha synap otyrǵan jáne birden-bir qarsy turǵan tulǵa» dep otyr.

Eskerte keteıik, 31 naýryz kúni ótken prezıdenttik saılaýdaǵy birinshi týrda Zelenskıı 30,24, al Poroshenko 15,95 paıyz daýys alǵany belgili.