Elimizdiń tuńǵysh Prezıdenti Nursultan Nazarbaev 2018 jylǵy 5 qazandaǵy Joldaýynda Medısınalyq–sanıtarıalyq alǵashqy kómekti (MSAK) damytýǵa qatysty tapsyrma bergeni belgili. Bul másele 2016-2019 jyldarǵa arnalǵan «Densaýlyq» baǵdarlamasynda da atap kórsetilgen. Sondyqtan eń basty baılyq – adam jáne ongyń densaýlyǵy. Bul oraıda Úkimet pen tıisti mınıstrlikter halyqtyń densaýlyǵyn jaqsartý jolynda tıimdi jumys istep jatyr. Sondaı-aq Tuńǵysh Prezıdent Nazarbaevtyń 2050 jylǵa qaraı álemniń eń damyǵan 30 eliniń qataryna ený úshin Ekonomıkalyq yntymaqtastyq jáne damý uıymyna múshe elder (EYDU) men Qazaqstannyń damýy arasyndaǵy alshaqtyqty joıý týraly tapsyrmasy bar. Osyǵan baılanysty qazirgi ýaqytta mıedısınalyq qyzmettiń sapasyn arttyrý úshin sońǵy eki-úsh jylda kóp jumys istelindi. Atap aıtar bolsaq,
dárigerlerdiń júktemesi azaıtyldy. 2018 jyly 1315 jalpy praktıka dárigeriniń ýchaskesi men 79 pedıatrıalyq ýchaske ashyldy. Dáriger mamandardyń tapshylyǵyn joıý maqsatynda 2019 jyly joǵary oqý oryndaryn bitiretin 5 myńnan astam jas túlektiń endi 1515-i jalpy praktıka dárigeri mamany bolady. Onyń ústine dáriger mamandyǵynyń tapshylyǵyn joıý úshin endi ýnıversıtet bitirgender barǵan jerinde kem degende úsh jyl qyzmet isteıdi. Bul mindetti. Ekinshiden bul qadam mamandardyń sol jerde turaqtanyp qalýyna septigin tıgizedi.
Qazirgi ýaqytta Medısınalyq–sanıtarıalyq alǵashqy kómekti (MSAK) qoljetimdi etý asa mańyzdy bolyp otyr. Sondyqtan úkimet pen tıisti mınıstrlik meduıymdardy irilendirý jumystary júrgizýde. Kóptegen medmekemeler jeke ınvestısıanyń qarajatymen salynýda. Sońǵy eki jylda osyndaı 214 nysan paıdalanýǵa berildi, onyń 31 paıyzǵa jýyǵy jekeniń qarjysyna salynǵan.
Endi «Densaýlyq» memlekettik baǵdarlamasy aıasynda sozylmaly aýrýlardy
basqarý baǵdarlamasy engizilmek. Munyń tıimdiligi óte zor. Óıtkeni syrqat emhanaǵa nemese dárigerdiń aldyna aýrýy asqynyp ketken kezde kelmeıdi. Dáriger maman da onyń aldyn alyp otyrady.
Taǵy atap ótetin bir nárse, Prezıdent tapsyrmasyna oraı, 2019 jyldyń basynan 36 myń ýchaskelik medısına qyzmetkerleriniń jalaqysy ulǵaıtyldy. Ol úshin memlekettik qazynadan 5,3 mlrd teńge jumsaý kózdelip otyr. Munyń barlyǵy aınalyp kelgende, Elbasynyń tapsyrmasy boıynsha júzege asýda. Sondaı- aq jalaqysy kóterilgen ýchaskelik medısına qyzmetkeriniń de jumysqa degen yntasy artady.
Sıfrlaný máselesi Medısınalyq–sanıtarıalyq alǵashqy kómek qyzmetinde óte tıimdiligin kórsetip otyr. Bir ǵana mysal, Densaýlyq saqtaý mınıstrligi baspasóz qyzmetinen alynǵan derekke sensek, qazirgi ýaqytta densaýlyq saqtaý uıymdaryn kompúterlik tehnıkamen jabdyqtaý 95,1 paıyzǵa jetken. Al qalalar men aýdan ortalyqtarynda medısınalyq aqparattyq júıeni engizý 100 paıyz bolyp otyr. Sıfrlandyrýdyń nátıjesinde emhanalarǵa kelý 2 esege, kezek sany 60 paıyzǵa qysqarǵan. Munyń barlyǵy da medısına salasyndaǵy bolyp jatqan ózgeristerdiń barǵan saıyn jaqsy nátıjesin kórsetip otyr. Demek alǵa jyljý bar. Bul árıne, Prezıdent tapsyrmasynyń oryndalýy men «Densaýlyq» baǵdarlamasynyń jemisi dep atap ótý kerek.
