Qazaqstan prezıdenti reseılik telearnaǵa suhbatynda Reseıge qarsy sanksıa jáne "Qytaıdyń Qazaqstanǵa qaýpi" týraly aıtty. Bul - Nazarbaevtyń saılaýdan keıingi alǵashqy suqbaty.
Reseıdiń "Rossıa 24" telearnasy mamyrdyń 26-synda Qazaqstan prezıdenti Nursultan Nazarbaevtan alynǵan suhbatyn jarıalady. Suhbatta Qazaqstan prezıdenti álemdik ekonomıkalyq daǵdarys, Ýkraınadaǵy jaǵdaı, "Qytaıdyń Qazaqstan ekonomıkasyna yqpaly" jaıly aıtqan.
Nazarbaev "Qazaqstan úshin daǵdarys syrtqy úsh faktordyń áserinen týyndady. Alǵashqysy - Qazaqstan eksporttaıtyn munaı-gaz ben metal baǵasynyń arzandaýy. Ekinshi sebep - Reseıge salynǵan zańsyz sanksıa. Sanksıa BUU-nyń maquldaýynsyz salyndy. Bular árıne, kórshimiz Reseıdiń damýyna kedergi keltirip otyr. Reseı - bizge kórshi ári biz úshin úlken naryq. Qazaqstan Reseımen birge Eýrazıa ekonomıkalyq odaqqa múshe" dedi.
Jýrnalıs Qazaqstan prezıdentinen "postsovettik keńistiktegi dana saıasatker retinde" "Sanksıa salynǵan eken, endi oǵan qalaı bolǵanda da beıimdelý kerek pe álde sanksıanyń joıylǵanyn kútken jón be?" dep surady.
Nazarbaev "sanksıaǵa úırenip ketý múmkin emesin" jáne onyń "barlyǵyna birdeı zıany tıetinin" aıtty.
- Eýropanyń ózinde bir-birine sanksıa sanksıa salǵandy keıbireýler qoldaı bermeıdi. Birinshiden, eýropalyq isker adamdardyń kóbi kapıtal salyp, aqsha tabatyn Reseı sıaqty úlken naryqtan aıyryldy. Reseı jaǵynyń da budan tartqan shyǵyny úlken. Sondyqtan da, sanksıadan eshkim utpaıdy. Biraq mundaı qıyndyqtar buryn da bolǵan, - degen Nazarbaev SSSR-diń de sanksıa astynda ómir súrgenin aıtty.
- Mundaı sanksıalar 1980 jylǵy Máskeý olımpıadasy kezinde salyndy, aýǵan soǵysynan soń tipti kúsheıdi. Biraq munyń barlyǵynyń ne keregi bar? - dedi Nazarbaev.
Nursultan Nazarbaev sanksıalyq saıasattyń Ýkraınadaǵy jaǵdaımen baılanysty ekenin, Ýkraınadaǵy ahýaldyń ushtyǵy Reseıge de tıgenin aıtty. "Reseı men Ýkraınanyń ózara túsinistikke kelip, til tabysatyn ýaqyty taıady. Eýropalyq jetekshiler de muny qalap otyr" dedi Qazaqstan prezıdenti.
Nazarbaev buǵan qosa Qazaqstan táýelsizdik jyldary "buryn-sońdy bolmaǵan ınfraqurylymdy damytýmen aınalysqanyn" jáne teńizge Reseı men Qytaı arqyly shyǵatynyn aıtty. Qazaqstan prezıdenti Reseıdiń Qytaımen birigip munaı-gaz, komýnıkasıa salalarynda iri jobalardy iske asyrýy Reseı ekonomıkasynyń Azıa-Tynyq muhıty aımaǵy ekonomıkasyna qosylýyna múmkindik týdyrǵanyn da aıtty.
Nursultan Nazarbaev Qazaqstan ekonomıkasynda Qytaı yqpaly artady degen qaýipti "fantomdyq úreı" dep atady. "Qytaıdyń belgili sharttarmen ekonomıkamyzǵa ınvestısıa salýǵa múmkindigi bolsa, turǵan ne jamanshylyq bar? Halyqaralyq ekonomıkanyń óz erejeleri bar. Búgin eshnárse istemesek, keıin ne bolady?" dedi Nazarbaev. Aıtýynsha, Astana Pekınmen birneshe kásiporyn qurylystaryna qatysty kelisim jasasý ústinde.
Bul - bıyl 26 sáýirde besinshi ret prezıdent bolyp saılanǵan keıingi Nursultan Nazarbaevtyń aqparat quralyna bergen alǵashqy arnaıy suqbaty. 74 jastaǵy prezıdent Nazarbaev 1989 jyldan beri Qazaqstan basshysy qyzmetin atqaryp keledi.
