Óńirimizde 1 mamyr — balalardy qorǵaý kúnine arnalǵan sharalar bastalyp ketti. Búgin oblystyq opera jáne balet teatrynyń ártisteri búldirshinderge Igor Morozovtyń «Doktor Aıbolıt» baletin tartý etti. Korneı Chýkovskııdiń tamasha ertegisin sahnalaýda ujym músheleri túptusqadan aýytqymady. Oqıǵa jelisi ańdardyń qamqorshysy Doktor Aıbolıt pen dostary — Tanechka, Qarlyǵash pen túlkiniń is-áreketteri arqyly órbip otyrady. Varvara, Kapıtolıı esimdi qaraqshylardyń olarǵa qarsy jasaǵan qastyǵy balet qoıylymyn odan ári shıelenistire túsedi. Alǵash ret 2009 jyly premerasy ótken «Doktor Aıbolıttegi » basty róldi Qazaqstannyń Jastar odaǵy syılyǵynyń laýreaty — Muhtar Áshirbaev somdasa, qoıýshy baletmeıster — teatrdyń bas baletmeısteri, Qazaqstannyń mádenıet qaıratkeri Rıta Haırýsheva. Sahnalaǵan — memlekettik syılyqtardyń laýretay  Qýanyshbek Sydyqov. Balettegi keıipkerlerdiń denin kishkentaı baldyrǵandar somdaǵan.

Muhtar Áshirbaev, Aıbolıt dárigerdiń rólin somdaýshy: «Bul — óte qyzyq ertegi. Búldirshinderdi adal bolýǵa, jaqsylyqqa, meıirimdi bolýǵa shaqyrady. Jáne bul baletti teatrdaǵy stýdıamyzǵa qatysatyn balalardyń qatysýymen sahnaladyq. Tipti arasynda sahnaǵa alǵash shyqqan kishkentaı balerınderimiz de bar. Bul — olar úlken tájirıbe. Kóremenderge unady dep oılaımyz».