Shymkenttik búldirshinder úshin arnaıy tis emhanasy bar. Baldyrǵandar endi tisin emdetýge eresektermen birge kezekte turmasa da bolady. Qalada alǵashqy ret mamandandyrylǵan balalar tis emhanasy ashylyp otyr. «Bebı smaıl» atty medısınalyq mekemeniń ereksheligi — balalardy oınata otyryp emdeıdi. Bul úshin emhananyń jabdyqtalýy, aýrýdy emdeıtin qurylǵylardyń barlyǵy arnaıy daıyndalǵan.

Jańadan ashylǵan nysan bir qaraǵanda emhanaǵa emes, balabaqshaǵa uqsaıdy. Óıtkeni medısınalyq mekemeniń jabdyqtalýy balalarǵa jaqsy kóńil-kúı syılaý úshin erekshe etip jasalǵan. Mundaǵy túrli oıynshyqtar, qabyrǵaǵa salyǵan sýretter ertegiden syr shertedi. Jasyratyny joq, eresekterge qaraǵanda balalardyń tisin emdeý qıyn. Bul tusta tis aýrýynyń kúrdeliligi emes, búldirshinderdiń dárigerlerden qatty qorqýy qıyndyq týdyryp jatady. Endi munyń barlyǵy artta qaldy deıdi mamandar.

Qala turǵyndarynyń biri Lúdmıla Saı kóp ýaqyttan beri balasynyń tisin emdetý úshin arnaıy mamandandyrylǵan emhana izdegen. Endi osy jańadan ashylǵan medısınalyq mekemedegi qyzmet arqyly eki birdeı ulynyń tisin emdetpek. Jas ana mundaǵy qyzmettiń sapasy da, baǵasy da kóńilimnen shyǵady deıdi. Emhanada úsh dárigerlik kabınet jumys isteıdi. Munda on alty jasqa deıin jetkinshekterdiń tisin emdeýge bolady. Medısınalyq mekemede zamanýı úlgidegi, Evropadan ákelingen medısınalyq qurylǵylar tolyq zalasyzdandyrylady. Eń bastysy — dárigerler balalardyń tisin emdeý úshin birinshi kezekte psıhologıalyq kómek kórsetedi.

Aıta ketetin jaıt, munda dárigerler balalarǵa ádettegideı aq halatta emes, túrli-tústi kıimde qyzmet kórsetedi. Emhanada tisin emdetken ár balaǵa syılyq ta beriledi. Nazar aýdaryńyzdar! «Bebı smaıl» balalar tis emhanasynda naýryzdan bastap bir aı boıy tegin profılaktıkalyq tekserýden ótýge múmkindik bar. Eń bastysy — medısınalyq mekeme demalyssyz jumys isteıdi. Mekenjaıy: Temirlan tasjoly, 1 A/6. «Baıan sulý» saýda úıiniń mańynda.