Shymkent qalalyq balalar aýrýhanasy 23 aqpannan jumysyn bastady. Jańa medısınalyq mekeme kóp salaly balalar aýrýhanasy bolyp sanalady. Munda jasóspirimderge joǵary bilikti mamandar qyzmet kórsetýde. Aýrýhanada 15 jasqa deıingi 10 myńnan astam jetkinshektiń stasıonarlyq em alýyna múmkindik bar.
Asar shaǵynaýdany aýmaǵynda ornalasqan №1 qalalyq balalar aýrýhanasy 270 orynǵa arnalǵan. Medısınalyq mekeme sý jańa ári zamanaýı úlgidegi qural-jabdyqtarmen qamtylǵan. Aýrýhananyń aýmaǵy keń. Eki korpýstan turady. «A» korpýsynda qabyldaý bólmesi, jaraqat pýnkti, shuǵyl naýqastarǵa shaǵyn operasıalyq bólme, qarqyndy terapıalyq emdeý palatalary bar. Qabyldaý bólmesiniń jumysy qazirdiń ózinde qym-qýyt. Mamandar ár naýqasty qabyldap, em-dom bólimderine jiberýde.
Júreginde aqaýy bar balalarǵa jańa aýrýhanada barlyq jaǵdaı jasalypty. Otyz tósek orny berilgen. Odan bólek oıyn alańshasy da bar. Eski aýrýhanada oıyn alańshasy bolǵan, biraq tar edi. Jańalyqty birden baıqaǵan ata-analar osyndaı jaǵdaıdy jasap otyrǵan bılikke rızalyqtaryn bildirýde. Solardyń biri — kishkentaı Mýbaraktyń anasy.
Ámına Ibragımova, ata-ana: «Operasıadan keıin úsh aı saıyn em alamyz. Jańa aýrýhana jaqsy eken. Tazalyǵynan bólek palatalar yńǵaıly salynǵan. Keń. Buryn bir palatada bes-alty adam jatatynbyz, endi úsh tósekten berilgen».
Jansaqtaý bólimi de sońǵy úlgidegi jańa tehnologıamen jabdyqtalǵan. Árbir naýqaspen em júrgizýge yńǵaıly. Olardyń árqaısysy beınebaqylaý kamerasymen baqylanady. Munda 18 tósek bar. Jańa týylǵan sábıden bastap 15 jasqa deıingi jetkinshekterdi emdeý úshin bilikti mamandar qyzmet kórsetedi.
Aqjol Abdraımov, jansaqtaý bóliminiń meńgerýshisi: «Burynǵy jaǵdaıǵa qaraǵanda qazir tym jaqsy. Jaǵdaı standarttarǵa saı jasalǵan. Árbir naýqasqa em-dom jasap, qyzmet kórsetýge óte yńǵaıly».
Aýrýhanadaǵy taǵy qyryq oryn ońaltý bólimine berilgen. Odan bólek oıyn alańshasy jáne Montessorı kabıneti bar. Týmasynan sal aýrýyna shaldyqqan búldirshinderdiń saýyǵyp ketýi arnaıy baǵdarlama arqyly qadaǵalanady.
Mýsaım Arystanov, ońaltý bóliminń meńgerýshisi: «Bir bala 10 kún emdeledi. Osy kún aralyǵynda arnaıy baǵdarlama túzilip, em qabyldaıdy. Arnaıy trenajer zaly bar. Oıyn alańshasy bar. Mundaǵy jabdyqtardyń barlyǵy týmasynan sal aýrýyna shaldyqqan nemese dısplazıa dıagnozy qoıylǵan balalarǵa arnalǵan».
Aýrýhanada 15 jasqa deıingi 10 myńnan astam jetkinshek stasıonarlyq em ala alady. Tek jańa medısınalyq mekemege jetý ońaıǵa soqpaı tur. Turǵyndar baǵyttyq kólikterdiń sany artsa, ıgi bolar edi deıdi. Al oǵan deıin jańa aýrýhanaǵa № 8 jáne 9 baǵyttaǵy avtobýstarmen jetýge bolady.
