Banner úshin 15 kúnge sottalǵan Beıbarys Tolymbekov áskerge ketti dep jazady Qamshy.kz aqparat agenttigi Vlast.kz saıtyna silteme jasaı otyryp.
Vlast.kz saıtynyń tilshisine suhbat bergen Beıbarys Tolymbekov áskerı boryshyn Jambyl oblysyndaǵy Otar áskerı garnızonynda óteıtinin aıtqan.
"Otarǵa apara jatyr, forma kıgizdi. Sizderdi kirgizbegen sıaqty? Qaı áskerı bólimge baratynymnan beıhabarmyn. Serjanttardy daıarlaıtyn bólimshe dep jatyr" - degen Tolymbekov.
Esterińizge sala keteıik, 21 sáýirde Almaty marafonynda Ásıa Týlesova men Beıbarys Tolymbekov kóshege "Shyndyqtan qashyp qutyla almaısyń», "Ádil saılaý úshin" jáne "Meniń óz tańdaýym bar" degen bannermen shyqqan. Olardy polısıa qyzmetkerleri jedel ustap, 15 kúnge sottalǵan bolatyn. 14 kúnnen keıin Ásıa men Beıbarys densaýlyǵyna baılanysty merziminen buryn bosatylǵan. Bul jaǵdaı jelide kóptegen qazaqstandyqtardyń narazylyǵyn týdyryp, áleýmettik jeli qoldanýshylary baner úshin abaqtyǵa jabylǵan jastarǵa qoldaý kórsetken edi.
Usynǵan: Mıat Káshibaı