Sırıadan kelgen áıel ómirindegi sumdyq oqıǵalar týraly aıtyp berdi dep jazady Qamshy.kz aqparat agenttigi. "Jýsan - 2" operasıasymen elge oralǵan áıel búginde  qujattaryn rettep, ońaltý ortalyǵynda ornalasqan. Qazirgi tańda psıhologtar men dárigerlerdiń baqylaýynda. 

22 jastaǵy Hadısha úshin emin-erkin serýendeý, eshteńede qoryqpaý oryndalmas arman bolǵan. Ol 5 jyldan astam ýaqyt 2 balasymen Sırıada turdy. Sondaı-aq ol múldem syrtqa shyqpaǵan. Sebebi, kúıeýi oǵan kóptegen shekteý qoıypty. Hadısha kúıeýiniń qaıda jumys istep, qalaı aqsha tapqanynan habarsyz bolǵan.

— Men ınternet arqyly bir jigitpen tanystym. Ol meni Sırıaǵa shaqyrdy. Sol jaqta barlyǵy keremet ekenin aıtty. Sırıada barlyǵy men qalaǵandaı bolatynyn aıtyp, sendire bildi. Al men barǵan kezde kúıeýim meni syrtqa shyǵarmaıtyn. Sebebi, meniń ne bolyp jatqanyn bilmeýim kerek boldy. Biraq ol meni únemi qadaǵalap otyra almady. Keıin men shyndyqty bildim. "Shyn mánisinde ne bolyp jatqanyn bilgennen keıin Sırıadan qalaı ketýge bolady?" degen suraqtyń jaýabyn izdeı bastadym, - deıdi Sırıadan kelgen áıel. 

Hadıshaǵa úıge bireý-mireýdi shaqyrýǵa, bóten adamdarmen sóılesýge tyıym salynǵan. Onyń mindetine bala tárbıesi men úı sharýasy ǵana kirdi. 

—Ol menimen ajyraspady da. Al "úıge qaıtqym keledi, Qazaqstandy saǵyndym" degen kezde "aýzyńdy jap" dep qysqa qaıyratyn. Sırıada barlyǵy men oılaǵandaı bolmady. Úsh uıyqtasam, túsime kirmeıtin oqıǵalarǵa tap boldym. Bul tek belgili bir adamdardyń jospary. Olar basqa adamdardy ózine sendirip, olardy qalaǵanynsha basqaryp, qalaǵanyn istetedi , - deıdi Hadısha. 

Hadısha kúıeýi qaıtys bolǵan soń tutqynnan qashyp shyǵýǵa múmkindigi boldy. Terrorısterdiń quryǵynan qashyp qutylý ońaı emesi belgili. Qashý kezinde qolǵa túsken adamnyń basyn shabatyn bolǵan. Tipti qashý týraly oılaǵan adamdy jazalap otyrǵan. Hadısha táýekelge bel býyp,  áskerı tutqyndarǵa arnalǵan lagerge deıin qashyp qutylady. Keıin ol Qazaqstanǵa ákelgen ushaqty kútip, elge oralady. 

Aýdarǵan: Ásel Bolatqyzy