Qatelesýdiń bári tanymnyń durys bolmaýynan kelip shyǵady. Pende neni tanysa, sony súıedi deıdi. Kimdi súıse, sonyń sońynda bolmaq. Batysta qyzmet etkenimde túrme men syrttaǵy ýahabıler tarıhı oqıǵalardy tańdaı qaǵyp tyńdaıtyn edi. Artynan olardyń ulttyq tarıhqa mahabbatyn baıqadym. Olardyń boıynda qalyptasqan tarıhı sana, olardyń otanǵa, jerge, ultqa degen mahabbatyna sebep boldy. "Salafıler tarıhty súımeıdi" degenge kelispeımin. Tegi pende ǵoı, olardyń. Tanyta almaı júrmiz. Óz teginen shyqqan ata-babalary týraly aıtsań, olardyń jany eleńdeıtinin baıqadym. Sóıtip, solaı, olardyń ata - babasyndaǵy bir tulǵaǵa degen mahabbatyn oıatý arqyly, tutas qazaqqa janyn burasyń. Odan kelip rýhqa degen mahabbaty bastalady olardyń. Rýhqa degen mahabbattary Allaǵa degen mahabbatqa ulasady (Sebebi qalypqa syımaıdy). Olar Allany súıýdiń ornyna, Allany qaharly dep úreılenip qatelesedi. Negizi bul ekeýi teń bolýy kerek sana tarazysynda. Olardyń Allaǵa degen tanymyn biz tarıh arqyly alyp shyǵamyz. Ýahabılerdiń sanasyndaǵy tartymdylyq keńistigin almastyrý degenimiz osy.

Bizge eshkimge elikteýdiń qajeti joq. Tarıhı jolymyz bar. Sony jańa kózqaraspen jańǵyrtsaq boldy. Biraq memleket ol jolǵa ǵylymı jolmen kelý jaǵynan kesheýildep jatyr. Sol baıaǵy elden keshigý ǵoı, bizdiki. Sodan basqa jurttardyń mádenıetin qabyldap. olarmen kúresip ketemiz. Sebebimen kúresýdiń ornyna, qaıtadan saldarymen kúresip ketemiz. Bul bir orynda turǵan arbanyń dóńgelegi sıaqty tirlik.

Erinshektik aqyldyń tonynan óte almaıtynyn bilgen soń, adamǵa sabyrdyń tonyn jamylyp keledi deıdi. Ókinishke qaraı, bizde sabyr degen erinshektik basym.

Bizge aıtys-tartystan góri, ortaq ıdeıaǵa qyzmet etý mańyzdy!

Jaras Ahan, tarıhshy-dintanýshy