"Naık" – amerıkalyq sporttyq kıimder kompanıasy. Onyń negizin Oregon ýnıversıtetindegi jeńil atletıka jattyqtyrýshysy Bıll Boýerman men onyń burynǵy stýdenti Fıl Naıt "Ribbon Sports" degen atpen qalaǵan bolatyn. Nike brendiniń shyǵý tarıhy stýdent Fıl Naıt sporttyq aıaq kıiminiń yńǵaısyzdyǵyn baıqaǵan 1964 jyldan bastalady dep jazady Qamshy.kz aqparat agenttigi.
Fıl Naıt sportshy bolǵandyqtan jattyǵýǵa yńǵaıly aıaq kıim kerek edi. Biraq 60-jyldary barlyq chempıondar kıetin Adidas brendtik krosovkasy da, arzan 5 dollarlyq krosovkanyń da sapasy tómen bolǵan. Fıl Naıt Oregon ýnıversıtetiniń ekonomıka bóliminde oqyp júrgende marketıńtik semınarlardyń birinde onyń oıyna óziniń taýarlyq brendin qurý ıdeıasy keledi. Ár stýdent ózindik jobasymen aınalysqanda úı tapsyrmasy retinde óz brendin damytý strategıasyn jáne marketıń josparyn jasaý tapsyrylǵan. Osylaısha, jahandyq brendti qurýdaǵy alǵashqy qadamdar jasaldy.
Fıl óziniń josparyna aıaǵyna deıin sendi. Sondyqtan, qoljetimdi jáne joǵary sapaly aıaq kıimdi shyǵarý úshin stýdent Japonıaǵa baryp, sheteldik jergilikti kompanıamen kelisimshart jasasady. Solaı óz krosovkalaryn shyǵara bastaıdy. Bastapqyda Fıldiń "Ribbon Sports" (kompanıa alǵash osylaı atalǵan) kompanıasynda tipti jeke dúken de joq bolǵan. Ol búkil eldi júk mashınasymen aralap, kóshede aıaq kıim satqan.
Bir kúni ol Djeff Djonson esimdi sportshyny kezdestiredi. Sodan beri barlyǵy ózgeredi. Tájirıbeli sportshy brendti alǵa jyljytýdy biletin úzdik marketolog bolyp shyǵady. Osylaı Fıl men Djonsonnyń krosovkalary satyla bastady.
1965 jyly olar kompanıa úshin jańa ataý "Nike"-ty oılap tapty. Sebebi Djonson túsinde Nık atty qanatty jeńis qudaıyn kóredi.
1971 jyly álemge tanymal "Naık" logotıpi paıda boldy. Ony Portlend ýnıversıtetiniń stýdenti Kerolın Devıdson bar bolǵany 30 dollarǵa oılap tapqan. Keıinirek Fıl Naıt ony gaýhar tastarmen kómkerilgen músinshemen marapattap, tipti kompanıa aksıasynyń bir bóligin beredi.
Ataqty logotıp aǵylshynsha «Swoosh» dep atalady jáne maǵynasy jeńis ákeletin Nık qudaıynyń qanatyn bildiredi.
Shynynda da, Nike kóptegen básekelesterin artta qaldyrdy, biraq onyń basty jetistigi – búkil álemdegi kóptegen adamdardyń senimi men alǵysy.
1990 jyly kompanıa óziniń sheteldik kásiporyndaryndaǵy eńbek sharttarynyń áshkerelenýinen zıan shekti, biraq sporttyq aıaq-kıimder men joǵary klasty kıimder óndiretin kásiporyn retinde saqtaldy. Qazirgi kezde "Nike" kompanıasy ártúrli sport taýarlaryn jasaýda kóshbasshy bolyp keledi.
