Saýda oryndary beretin chekter adam aǵzasynda obyr men qant dıabetiniń órshýine ákep soǵady. Mamandar ondaǵan jyl boıy alyp júrgen túbirtektiń osyndaı zıany týraly aıtty. Alaıda, dál  qazirgi ýaqytta bul dáıek elektrondy chekke kóshý jaǵyna múddelilerdiń marketıńtik qadamy da bolýy múmkin. Al salyq organdary qaýipti túbirtek úshin 100 smartfon syılaýǵa ázir dep jazady Qamshy.kz aqparat agenttigi.  Eýrazıa birinshi arnasynyń deregin negizge alyp.

Kelesi jyldan bastap barlyq saýdagerler men qyzmet kórsetýshiler kasalyq apparattaryn onlaın júıege beıimdeýi tıis. Ondaı múmkindigi joqtar, jańadan qurylǵy alýy shart. Zań talaby osy. Bolmasa, aıyppul tóleýge týra keledi. Biraq saýdagerlerdiń biri jańa apparat izdep júrse, biri eskisin de áli durys qoldanyp úlgermegen.

"Myna qorap sol jatqan kúıi jata bere me sonda?  Jatady. Bir aıda bir adam surasa, suraıdy, suramasa ol da joq. Ne keregi bar onyń? Qanshama adamdy qınap, osyny aldyryp jatyr. Mynanyń qansha turatynyn bilesiń be? 65 myń teńge", - deıdi saýdager Nurken Aqymbek.

"Kasalyq apparatqa úırenip qalǵanbyz. Onlaınǵa kósh dep jatyr. Kóshýimiz kerek qoı zańdy túrde. Endi Úkimetke eshkim qarsy tura almaıdy ǵoı", -dep pikir bildirdi Baqytbek Nurtaev esimdi saýdager.

Elordada shamamen 64 myńnan asa kasalyq apparat qoldanylady. Jartysynan kóbi ıaǵnı, 39 myńnan astamy áli onlaın júıege kóshpegen. Mamandar aıaq astynan kúndelikti qoldanystaǵy chektiń asa qaýipti ekenin aıta bastady. 

Kasalyq apparattan shyǵatyn chek obyr men qant dıabetine sebepshi bolýy múmkin eken. Óıtkeni, qaǵaz quramynda zıandy zat bar kórinedi. Buǵan deıin nege bul týraly jarıaǵa jar salyp aıtylmaǵany áli kúnge deıin jumbaq. Bálkim onlaın kasaǵa ótýdi jedeldetýdiń bir joly shyǵar.

Eski apparattyń ishin aqtaryp, onlaın júıege qosýǵa bolady eken. Biraq, qurylǵylardy satatyndar jańasyn alǵan tıimdirek bolatynyn aıtady.

Sondaı-aq talap boıynsha chekte QR-kod bolýy shart. Elimizde qazir jańa joba qolǵa alynypty. Oǵan chek berý úshin apparatty satyp alýdyń qajeti joq. Smartfonǵa arnaıy qosymsha júktep, aıyna 3 myń teńge tólep otyrýǵa da bolady.

Jańa úlgidegi kasaǵa kóshýdi yntalandyrý sharasy bul. Memlekettik kirister komıteti demeýshilerdiń kómegimen chek talap etkish azamattarǵa 100 kúnde 100 smartfon syılaımyz dep otyr. Utysqa ıe bolǵandardyń biri qarapaıym kasa qyzmetkeri. Úsh myń teńgege saýda jasap, gadjetti ıemdendi.

Ekologtar eski apparatty qoqysqa tastamaýǵa keńes beredi. Odan keler zalal aýyr eken. Apparat satýshylar ony aýystyryp, jańasyn jeńildikpen berýge ázir.

Usynǵan: Ásel Bolatqyzy