Qazaqstannyń namysyn qorǵap júrgen Olımpıada chempıony Danıar Eleýsinov(6-0, 3 KO) kásipqoılar quramynda óziniń jetinshi jekpe-jegin Chılıdiń bylǵary qolǵap sheberi Lýıs Norambýenmen(3-1-1, 0 KO) ótkizedi dep habarlaıdy Qamshy.kz aqparat agenttigi Vesti.kz saıtyna silteme bere otyryp.
Ortasha salmaqta óner kórsetetin qos boksshynyń jekpe-jegi AQSH-tyń Merılend shtatyna qarasty Okson-Hıll eldi mekeninde ótetin bokstyń anderkart bóligine jatady. Basty kezdesýde jeńil salmaqtaǵy WBC International ataǵynyń ıegeri Devın Heını(21-0, 13 KO) men meksıkalyq Antonı Moran(24-3, 17 KO) qolǵap túıistiretin bolady.
Osyǵan deıin Danıardyń qarsylasy Mıgel Zamýdıo bolýy tıis edi, biraq Merılen komısıa músheler meksıkalyqty alańǵa shyǵýǵa jaramsyz dep tapty.
Bul 27-jastaǵy Eleýsinovtyń AQSH- taǵy tórtinshi kezdesýi. Ol 2018 jyldan bastap, kásipqoılar deńgeıinde synǵa tústi. Sonymen qatar, Ulybrıtanıada eki ret baǵyn synap, bir ret Monakoda ózin kórsetken.
Danıardyń qurdasy Norambýeno de 2018 jyldyń tamyz aıynan bastap kásipqoı deńgeıge ótti. Jartylaı salmaqtaǵy alǵashqy kezdesýin týǵan jerinde ótkizip, qarsylasymen teń túsken, osydan keıingi Chılıde ótkizgen úsh jekpe-jekte de jeńisti qanjyǵasyna baılaǵan. AQSH-tyń tórinde 10-mamyrdan bastap baǵyn synap, alǵashqy jarysta amerıkalyq Vardges Vardanánǵa(7-0, 1 KO) ese jibergen.
Qarsylastar búgin salmaqtaryn ólshedi. Ekeýiniń de salmaǵy 147 fýnttan(66,678 keli) asty. Eki taraptyń kelisimi boıynsha, artyq salmaqqa ruqsat etilgen. Otandasymyzdyń salmaǵy qarsylasyna qaraǵanda 454 gram aýyr. Demek 68,129 keli men 67,675 keli synǵa túsetin bolady.
Eleýsinov pen Norambýenonyń qatysýymen ótetin boks Nur-Sultan ýaqyty boıynsha mamyr aıynyń 25-nen 26-syna qaraǵan túni bastalady. Qazaqstandyqtyń saıysyn elimizde tikeleı efırden kórsetedi.
Aýdarǵan: Bek Baıtas
