Eýrazıalyq damý bankiniń Keńesi QR premer-mınıstri Asqar Mamındi Keńestiń Tóraǵasy retinde saılady. Qazaqstan Respýblıkasynyń premer-mınıstri Asqar Mamınniń tóraǵalyǵymen Eýrazıalyq damý banki (EADB) Keńesiniń otyrysy ótti dep habarlaıdy Qamshy.kz aqparat agenttigi Úkimet saıtyna silteme jasap.
Otyrys jumysyna EADB Keńesiniń músheleri: Reseı Federasıasynyń Úkimeti tóraǵasynyń birinshi orynbasary - RF qarjy mınıstri A. Sılýanov, Qazaqstan Respýblıkasynyń premer-mınıstriniń birinshi orynbasary - qarjy mınıstri Álıhan Smaıylov, Armenıa Respýblıkasynyń vıse-premeri M. Grıgorán, Belarýs Respýblıkasynyń qarjy mınıstri M. Ermolovıch, Qyrǵyz Respýblıkasynyń qarjy mınıstri B. Jeenbaeva, Tájikstan Respýblıkasynyń qarjy mınıstri F. Kahhorzoda qatysty.
Otyrys barysynda Banktiń 2018 jyldaǵy jumysynyń qorytyndysy shyǵaryldy, Eýrazıalyq ekonomıkalyq odaqqa múshe memleketter arasyndaǵy saýda-ekonomıkalyq baılanystar men ınvestısıalyq qyzmetti damytýǵa járdemdesýge baǵyttalǵan ıntegrasıalyq jobalardy iske asyrý máseleleri qaraldy.
Búginde Bank qorjyny 3,5 mıllıard dollar somasyna 85 jobadan turady. Barlyq jobalardyń 40 paıyzǵa jýyǵy Qazaqstan aýmaǵynda iske asyrylyp jatyr. 2018 jyly EADB 1,4 mıllıard dollar somasyna 29 jańa jobany maquldady, sonyń ishinde Pavlodar oblysynda 197 mıllıon evro somasyna "Bogatyr Kómir" JSHS óndiristik prosesterin jańǵyrtý, Almaty oblysynda 32 mıllıard teńgege "Nur Joly" avtokólik ótkizý pýnktiniń qurylysy, Túrkistan oblysynda 22 mıllıard teńgege sý elektr stansıasyn salý jobalary bar. 2019 jyly Ereımentaý qalasynyń aýdanynda qýattylyǵy 50 MVt bolatyn jel elektr stansıasynyń qurylysy qarjylandyrylady.
Banktiń tabysty jumysynyń nátıjeleri boıynsha bıyl naýryz aıynda Standard&Poor's halyqaralyq agenttigi "BBB" deńgeıine deıin Eýrazıalyq damý bankiniń nesıe reıtıńin arttyrdy. Qazaqstannyń premer-mınıstri Asqar Mamın EADB Eýrazıalyq ekonomıkalyq odaqqa múshe memleketterdiń yntymaqtastyǵyn damytýǵa jáne birlesken jobalardy qarjylandyrýǵa óz úlesin qosatynyn atap ótti.
"Ortaq mindet - bizdiń ıntegrasıalyq ınvestısıalyq jobalardyń tıimdiligin arttyrý", - dedi Mamın.
Usynǵan: Maqpal Sembaı
