Qazaqstan prezıdenti Qasym-Jomart Toqaev «Rossıa 24» telearnasynyń jýrnalısi Andreı Kondrashovqa bergen suhbatynda, qaramaǵyndaǵy adamdarǵa WhatsApp arqyly tapsyrma beretinin málimdedi dep habarlaıdy Qamshy.kz aqparat agenttigi.

"Áleýmettik jelilerdi paıdalaný men úshin tańsyq emes, men áleýmettik jelilerde jumys isteımin. Shyndyǵyna kelgende keıbir tapsyrmalardy WhatsApp arqyly beretin kezderim de bolady. Múmkin buny qaýipsizdik jaǵynan alyp qaraıtyn bolsańyz, durys emes te shyǵar. Biraq yńǵaıly ári jyldam", - dedi prezıdent.

Esterińizge sala ketsek, Qasym-Jomart Toqaev Qazaqstan úkimetinde alǵashqylardyń biri bolyp Twitter áleýmettik jelisinde óziniń jeke paraqshasyn ashqan bolatyn.

"Iá, men Twitter-di BUU-dan alyp keldim. Ol jerde Twitter-de jeke paraqshańdy júrgizý kerek degen sheshim shyqqan. Sol sebepti men halyqpen baılanystyń osy túrine qosyldym. Twitter degenimiz ne? Bul is júzindegi jeke telegraf agenttigi. Mysaly, búgin men bir-eki jol jazba jarıaladym. İshki ister mınıstrligine oblystardyń birindegi polısıa bastyǵynyń orynsyz qylyǵyna baılanysty qalyptasqan jaǵdaımen kúresýdi tapsyrdym. Qyzmettik tergeý amaldary taǵaıyndalyp, qatań jaza qoldanylatyn bolady. Tvıtterge jazba qaldyryp, naqty tapsyrmalar berilgennen keıin jáne oǵan barlyǵy kýá bolyp otyrǵanda men nege bireýge habarlasyp, qandaı da bir ótinish aıtýym kerek?", - dedi Toqaev.

Sonymen qatar jýrnalıske bergen suhbatynda Qasym-Jomart Toqaev prezıdent bolǵannan keıin usynys boıynsha Instagram-ǵa tirkelgenin aıtty.