Aqtaýdaǵy Nazarbaev Zıatkerlik mektebiniń qazaq tili men ádebıeti pániniń muǵalimi Aıgúl Aıtan jáne nemis tili pániniń muǵalimi Asel Baımuhanbetova, 11-synyp oqýshylary Farıda Ospan, Nesibeli Altybaı, Amına Abil mamyrdyń 9-y men 13-i aralyǵynda Germanıanyń Bremen qalasynda ótken ekologıa taqyrybyna arnalǵan V halyqaralyq jastar konferensıasyna qatysyp qaıtty. Konferensıa qatysýshylary Mańǵystaý óńirindegi tamasha tabıǵaty bar Túpqaraǵan aýdanynda týrızmdi damyta otyryp, ekotýrızmdi damytýdy usyndy.

Máskeýdegi Góte ýnıversıtetiniń qoldaýymen konferensıaǵa álemniń 11-elinen 13 komanda qatysqan. Jıyn qonaqtary ekologıalyq problemalardy kóterip, olardyń sheshý jolyn nemis tilinde qorǵady. Eń aldymen problemalarǵa arnalǵan poster-sessıa ótse, ekinshi kezeńde qatysýshylar óz usynystaryn prezentasıa arqyly bildirdi. Aıta keteıik, mańǵystaýlyq zıatkerler Qazaqstannan barǵan jalǵyz komanda.

Oqý jylynyń basynda mekteptiń ǵylymı jumys jónindegi úılestirýshileri ǵylymı jobalar men konferensıalardyń sıklogrammasyn jasaqtaǵan bolatyn. Osy sıklogrammadan óz múmkindigim men zertteý jumysymyzǵa qaraı atalǵan konferensıa jaıly bilip, qatysyp kórýdi sheshtik. Basty másele joba nemis tilinde qorǵalýy tıis boldy. Bul turǵydan oqýshylarymyzdyń nemis tili úıirmesine qatysýynyń arqasynda jınaǵan bilimi men pán muǵalimi Asel Baımuhanbetovanyń kómegi kóp tıdi, - deıdi joba jetekshisi Aıgúl Aıtan.

Zıatkerler Túpqaraǵandaǵy kórikti jerlerde ekotýrızmdi damytý máselesimen birneshe aıdan beri aınalysyp keledi. Olar Qapy, Tamshaly, Aqespe, Sultan úpi, Túlkibas, Saýra, Fort-SHevchenko, Sartas, Shaqpaq ata  sekildi kórnekti oryndar belgilengen marshrýttyq karta syzyp, atalǵan jerlerdiń topyraǵynyń, sýynyń qunarlylyǵyn zerttegen. Zertteý jumysyn qorytyndylaı kele, marshrýttyq kartaǵa engen óńirlerde tabıǵı qalpyn saqtaıtyn týrısik ortalyqtar jasaýdy usynyp otyr.

Aıta keteıik, 2018-2019 oqý jylynan bastap, zıatkerlik mektep oqýshylary nemis, káris, fransýz, qytaı tilderin ekinshi shet tili retinde meńgere bastaǵan edi.