Almatyda azamattardyń syrtynan nesıe rásimdegen alaıaq izdestirilýde! Jasy shamamen 45-50-lerdegi er adam jurttyń joǵaltqan kýálikterimen bankterge baryp, qaryz alyp otyrǵan. Al nesıeni taratqan bank menedjerleri ózderiniń de alaıaqqa aldanǵandaryn aıtyp aqtalyp otyr dep jazady Qamshy.kz aqparat agenttigi KTK arnasyna silteme bere otyryp.

Taspaǵa túsip qalatynyn bile tura, batyly jetip jurttyń syrtynan nesıe alǵan adam osy. Al qaryzdy ol bir emes, úsh birdeı bankte rásimdegen. Ánsheıinde aqshaǵa kelgende esebi myqty mekemelerdiń qyzmetkerleri kelgen klıentke, qolyndaǵynyń bóten qujat ekenin baıqamaı, 2 mıllıon teńgeden astam qaryzdy ustata salǵan.      

 Saltanat Ázirbek, Almaty qalasy Polısıa departamenti resmı ókili:

«Bankterge baryp nesıe alǵan. Taýar nesıelerin de alǵan. Mindetti túrde bul azamat ustalyp, qylmystyq jaýapkershilikke tartylatyn bolady.»,- deıdi.

Alaıaqtyń aty-jóni ázirge belgisiz. Degenmen, Batys Qazaqstan turǵyny degen boljam bar. Óıtkeni aınaldyrǵan bir kúnniń ishinde sol óńirden birneshe adam oǵan aldanǵandaryn aıtyp qońyraý shalypty. Bul oqıǵa boıynsha bank qyzmetkerlerinen de jaýap alynǵan. Biraq bári de sýdan taza, sútten aq bop shyǵypty. Al álgindeı jaǵdaı Marat Ábdirahmanovtyń da basynan ótken. Áldebireýler bes jyl buryn joǵaltqan kýáligi arqyly bankten jarty mıllıonǵa jýyq nesıe alypty. Ol týraly almatylyq jarty jyldan soń bir-aq bilgen. Marat Ábdirahmanov:

«Avtosalonnan nesıege kólik almaq boldym. Biraq, bank maǵan nesıe berýden bas tartty. Maǵan jarty jyl tólenbegen qaryzymnyń baryn aıtqanda, qaıterimdi bilmeı qaldym. Nesıe almaǵanymdy dáleldeý úshin kóp qınaldym.»

Marat Ádbirahmanov bop qaryz alǵandar sol ustatpaı ketken. Bir qyzyǵy, jigittiń osynshama ústemaqysy óse tura, bank ony izdemegen. Tipti shotyn da buǵattamaǵan. Sol sebepti, bilmeı júre bergen. Keıin taspadan belgili bolǵandaı, aqshany oǵan múldem uqsamaıtyn adam alǵan. Al banktegiler bulaı bolýy múmkin emes dep otyr. Lázzat Esmurzaeva, bank ókili:

«Klıenttiń ózi kelmeı biz nesıe bermeımiz. Ondaı jaǵdaı múmkin emes. Qaryzǵa aqsha bermes buryn barlyq málimetti talap etemiz. Týystarynyń nómirleri alynady. Jumys orny týraly aqparat. Odan bólek, ózin de sýretke túsiremiz.»

Alaıaqtardan saqtanýdyń bir joly bar. Ol sms-habarlama. Biraq ol úshin aı saıyn 200 teńge tólep turý kerek. Indıra Qarlybaeva, kredıttik búro qyzmetkeri:

«Sizge habarlama keledi. Iaǵnı, ondaı habarlama kelgen kezde siz banktiń ózine baryp, men eshqandaı nesıe rásimdep otyrǵan joqpyn dep aıtýyńyzǵa, ótinish jazýyńyzǵa quqyǵyńyz bar.»

Al osy kezge deıin turǵyndarldyń júıkesine tıetin mundaı áreketteri úshin eshqandaı bank jaýapqa tartylmaǵan. Jalpy, Almatyda jyl basynan beri osyndaı alaıaqtyqqa qatysty 17 adam ustalǵan. Olar 60 adamnyń ústinen nesıe alyp, keıbiriniń tipti bank kartalaryna deıin qol salǵan.

Daıyndaǵan: Bek Baıtas