Búgin elimizdiń barlyq óńirindegi polıseıler kúsheıtilgen jumys tártibine kóshti. El qaýipsizdigin kúzetýge 21 myńnan astam tártip saqshysy jumyldyrylǵan. Ár aýla, ár kóshe, tipti qaltarys-bultarystarǵa deıin búgin qatań baqylaýda. Ondaǵy maqsat – saılaýshylardyń alańsyz, emin-erkin daýys berýine jaǵdaı jasaý. Jáne turǵyndardyń qaýipsizdigin qamtamasyz etý. Bul kúni elimiz boıynsha 10 myń saılaý ýchaskesi saqshylardyń baqylaýynda.

«Qaýipsizdikti qamtamasyz etý úshin barlyq saılaý ýchaskelerinde patrúldik polısıa qyzmetkerleri jumys isteıdi. Qoǵamdyq tártipti qorýǵa 21 myńnan astam saqshy jumyldyrylady. Mundaı qaýipsizdik sharasyn birinshi ret uıymdastyryp otyrǵan joqpyz. Bul – ár saılaý kezinde bolatyn dástúrli jumys», – deıdi QR İshki ister mınıstri Erlan TURǴYMBAEV.

Almatynyń tártip saqshylary da bul kúni kúsheıtilgen rejımde jumys istep jatyr. Árbir saılaý ýchaskesiniń mańyna eki-úsh polıseıden kúzetke qoıylyp, olar kirpik qaqpaı qoǵamdyq tártipti baqylap tur.

Aıta ketsek, almatylyq polıseıler 12 maýsymǵa deıin osyndaı kúsheıtilgen rejımde jumys isteıdi. 2000-nan astam saqshy ásirese adamdar kóp júretin qoǵamdyq oryndardy qatań baqylaýǵa alady.

«Saılaý kúni qoǵamdyq tártipti qamtamasyz etý maqsatynda saılaý ýchaskeleriniń tóńireginde tártip saqshylary kúsheıtilgen rejımde jumys isteıdi. Iaǵnı bul – qandaı da bir zańsyz is-áreketterdi boldyrmaýǵa, sonymen qatar qoǵamdyq tártipti saqtaýǵa jáne usaq-túıek quqyq buzýshylyqtardy aıqyndaýǵa baǵyttalǵan is-shara», – deıdi Almaty qalasy PD resmı ókili Saltanat ÁZİRBEK.