Búgin Qazaqstan tarıhy taǵy bir jańa paraqpen tolyǵady. Búgin, el halqy egemendi memlekettiń ekinshi Prezıdentin saılaıdy. Tańǵy saǵat 7:00 den bastap respýblıkadaǵy barlyq saılaý ýchaskelerinde daýys berý naýqany bastaldy  dep habarlaıdy Almaty.tv tilshisi.

Qazaqstan Prezıdentiniń kezekten tys saılaýyna daýys berý saǵat 20: 00-ge deıin jalǵasady. El basqarýǵa úmitker bolǵan jeti kandıdat bir aı merziminde úgit-nasıhat jumystaryn júrgizip, saılaýaldy baǵdarlamasymen tanystyryp úlgerdi.

Mańyzdy oqıǵany 2 myńǵa jýyq sheteldik baqylaýshy baqylaýǵa kirisken. Jalpy, atalǵan saılaýǵa 12 mıllıon qazaqstandyq qatysady degen boljam bar. Al, baqylaýshylardyń deni el astanasy Nur-Sultanǵa shoǵyrlanǵan. Elordalyq turǵyndar da belsendilik tanytyp, tań atqannan beri saılaý ýchaskelerine aǵylyp jatyr.

Jalpy, búgin respýblıka boıynsha 9920 saılaý ýchaskesi jumys isteıtin bolady. Ol jerlerde 70 myńǵa jýyq adam jumys istep jatyr. Shet elde júrgen 15 myń qazaqstandyq ta daýys berýge nıetti ekenderin bildirgen. Qazir olar úshin 18 saılaý ýchaskesi jumys isteýde.

«Daýys bergen saılaýshylar týraly aqparat Ortalyq saılaý komısıasyna saǵat 10da kelip túsedi. Ár eki saǵat saıyn aqparatty jańartyp otyramyz», - deıdi QR Ortalyq saılaý komısıasynyń hatshysy Sabıla MÝSTAFINA.

Bıylǵy saılaýdyń burynǵylarynan ózgeshe ekenin baıqaýǵa bolady. Máselen, osy joly sheteldik baqylaýshylar men buqaralyq aqparat quraldarynyń sany kóp. Dál qazir naýqandy 1013 halyqaralyq ókil baqylaýda. Al, Qazaqstandaǵy daýys berýdi nasıhattaý úshin sheteldik jýrnalıserdiń rekordtyq sany akredıtasıalanypty. 40 memleketten 227 tilshi kelgen. Ortalyq saılaý komısıasynda ıne shanshar oryn joq.

Saılaýdyń taǵy bir mańyzdy ereksheligi – prezıdenttik saılaýǵa alǵash ret áıel adam qatysyp otyr. Kandıdattardyń da sany jeteýge jetti. Olardyń barlyǵyna teń jaǵdaı jasalǵan.

Aıta keteıik, kezekten tys prezıdenttik saılaýǵa 9,4 mlrd teńge bólingen. Bul somanyń basym bóligi saılaý ýchaskelerinde jumys isteıtin adamdardyń jalaqysyna baǵyttaldy. Aqsha Úkimettiń rezervinen alyndy.