Grek-rım kúresinen álem jáne eýropa chempıony, Olımpıada oıyndarynyń birneshe dúrkin júldegeri Dáýlet Turlyhanovtyń anasy Turlyxanova Marzıa Aıtbaıqyzy dúnıeden ótti dep habarlaıdy Qamshy.kz aqparat agenttigi.

Bul týraly Mádenıet jáne sport mınıstri Arystanbek Muhamedıuly feısbýk paraqshasynda jazdy.

"Eń jaqyn adamy - analary Márzıa Aıtbaıqyzynan aıyrylǵan Turlyhanovtar otbasyna qaıǵyryp kóńil aıtamyn. Dúnıege on bala ákelip, tárbıelep ósirgen, solardyń ishinde grek-rım kúresinen KSRO segiz dúrkin chempıony, Álem kýbogynyń eki dúrkin ıegeri, Olımpıada oıyndarynyń júldegeri Dáýlet Turlyhanovtyń anasy meıirimdi, parasatty tulǵa edi.

Batyr ana, Qazaq SSR Eńbek sińirgen ustazy, QR Bilim berý úzdigi, QR Eńbek sińirgen qaıratkeri, daryndy balalarǵa arnalǵan «Bolashaq» mektebiniń negizin qalaýshy jáne dırektory, naǵyz Ustaz Márzıa Aıtbaıqyzy bala tárbıesinde óz basynyń úlgisi mańyzdy dep sanaıtyn. Óziniń bolashaq ómirlik joldasy Bolat Turlyhanulymen shańǵy jarysynda tanysyp, keıin otbasyn quryp, balalaryn sport pen tártipke baýlyp, baqytty ǵumyr keshti. Ataqty qazaq kúresshisi, Qazaqstannyń eńbek sińirgen bapkeri Bolat Turlyhanulymen Márzıa Aıtbaıqyzy o dúnıede kezdesedi dep senemin. Imandy bolsyn.

Qoshtasý rásimi 17 maýsym kúni saǵat 10:00 «Dostyq» sport saraıynda ótedi. Meken-jaıy: Abaı dańǵyly, 48 A" delingen jazbada.

Qamshy.kz aqparat agentiginiń ujymy Marzıa Aıtbaıqyzynyń otbasyna jáne dańqty balýan Dáýlet Bolatuly Turlyhanovqa kóńil aıtady.