Bul týraly «Nur Otan» partıasy Tóraǵasynyń Birinshi orynbasary Máýlen Áshimbaev óziniń Facebook-tegi paraqshasynda jazdy.

«Búgin Túrkistan oblysynyń Arys qalasynda ornalasqan áskerı bólimniń aýmaǵynda jarylys boldy. Memleket basshysy Qasym-Jomart Toqaev tótenshe jaǵdaıdyń zardaptaryn joıyp, jarylystyń sebepterin anyqtaý jáne turǵyndardyń qaýipsizdigin qamtamasyz etý jóninde shuǵyl sharalar qabyldaýdy tapsyrdy. Óńirde oblys ákimi, partıamyzdyń aımaqtyq fılıalynyń tóraǵasy Ómirzaq Shókeev jetekshilik etetin jedel shtab quryldy», – delingen jazbada.

Sondaı-aq Máýlen Áshimbaev bul oqıǵa boıynsha «Nur Otan» partıasynyń belsendi áreketin atap ótken.

«Qazirgi tańda «Nur Otan» partıasynyń aımaqtyq jáne aýmaqtyq fılıaldarynyń ókilderi turǵyndardy qaýipsiz jerge kóshirip, ornalastyrý jumystaryna belsendi qatysýda. Jergilikti jerde partıamyzdyń oblystyq fılıalynyń basshylyǵy ákimdikpen jáne Tótenshe jaǵdaılar departamentimen birlesip oqıǵaǵa qatysty máselelerdi sheshý jumystaryn júrgizýde», – deıdi partıa Tóraǵasynyń Birinshi orynbasary.

Sonymen qatar ol partıanyń Arys turǵyndaryna qajetti barlyq kómek sharalaryn qolǵa alatynyn tilge tıek etedi.

«Bizdiń partıa Arys qalasynyń turǵyndaryna qajetti barlyq kómek sharalaryn qolǵa alady. Azyq-túlikpen jáne kıim-keshekpen qamtamasyz etýden bastap, olardyń ýaqytsha ornalasýlaryna, aldaǵy ýaqytta eldi mekenniń ınfraqurylymyn qalpyna keltirýge deıingi jumystarǵa tikeleı atsalysamyz. Búginnen bastap partıamyzdyń Túrkistan oblystyq fılıaly gýmanıtarlyq kómek jınaý jumystaryn qolǵa aldy. Bul jumysqa partıamyzben birge elimizdegi barlyq bastaýysh partıa uıymdarynyń ókilderi de jumyldyrylady.

Aldymen Arys qalasynyń ár turǵynynyń qaýipsizdigin qamtamasyz etip, keıin jedel túrde oryn alǵan oqıǵanyń sebep-saldaryn anyqtaý qajet dep esepteımin. Bizdiń partıa bul is boıynsha tergeýdiń ashyq ári ádil júrgizilýin talap etedi», – delingen Máýlen Áshimbaevtyń jelidegi jazbasynda.