Partıanyń uıymdastyrýymen elimizdiń barlyq óńirinde gýmanıtarlyq kómek qabyldaıtyn oryndar ashylyp, olar táýlik boıy jumys istep jatyr. Qazirdiń ózinde partıanyń bastamasymen birqatar oblystan azyq-túlik, kıim-keshek jáne basqa da kerek-jaraqtar tıelgen avtorkerýender jolǵa shyqty. Olardyń aldy mejeli jerge jetip, halyqqa úlestirilip te jatyr.

Bul týraly partıa Tóraǵasynyń Birinshi orynbasary Máýlen Áshimbaev Facebook-tegi paraqshasynda jazdy.

«Alǵashqylardyń biri bolyp keshe partıamyzdyń Qaraǵandy oblystyq fılıaly azyq-túlik, kıim-keshek jáne basqa da kerek-jaraqtardan turatyn 10 tonna gýmanıtarlyq kómek jiberdi. Partıanyń muryndyq bolýymen Qyzylorda, Aqtóbe, Pavlodar, Qostanaı jáne Soltústik Qazaqstan oblystarynan da avtokerýender jolǵa shyqty», – delingen jazbada.

Sonymen qatar jazbada zardap shekken arystyq balalardyń jazǵy demalystary da nazardan tys qalmaıtyny aıtylǵan.

«Partıamyzdyń Aqmola oblystyq fılıaly Shýchınsk-Býrabaı demalys oryndarynda arystyq 100 balanyń demalysyn qamtamasyz etedi. Pavlodar oblysy da jazǵy maýsymda 300 balanyń demalysyna jaǵdaı jasaýǵa daıyn. Osyǵan baılanysty balalardyń tizimin jasaqtaý jumystary da bastalyp ketti», – deıdi Máýlen Áshimbaev.

Qazirgi tańda «Nur Otan» partıasy janyndaǵy Balalar quqyǵyn qorǵaý jónindegi respýblıkalyq keńestiń ókilderi, sonyń ishinde bilikti psıholog mamandar apat bolǵan óńirge arnaıy baryp, zardap shekken ata-analar men balalarǵa jan-jaqty kómek kórsetýde. Sondaı-aq «Jas Otan» jastar qanatynyń músheleri aımaqtaǵy eriktilerdiń basyn qosyp, bilek sybanyp áreket etýde.

Máýlen Áshimbaev jelidegi jazbasynda aldaǵy ýaqytta da partıa tarapynan qolǵa alynǵan osy baǵyttaǵy aýqymdy jumystar qarqyndy túrde jalǵasatynyn aıtqan.

Odan bólek, «Nur Otan» partıasynyń músheleri, kásipker azamattar da bul jaǵdaıǵa beıjaı qaramaı, kómek qolyn sozyp jatyr. Atap aıtqanda, Aqtóbe oblystyq máslıhatynyń depýtaty, «Nur Otan» partıasy Saıası keńesiniń múshesi T.Esenǵulov tótenshe jaǵdaıdan zardap shekken azamattarǵa kómek kórsetý maqsatynda 50 mıllıon teńge qarajat bólgen. Partıa Saıası keńesiniń taǵy bir múshesi, atyraýlyq kásipker 1 mıllıon teńge kóleminde qarjylaı qoldaý kórsetse, Shymkent qalalyq máslıhatynyń depýtaty, «Nur Otan» partıasy fraksıasynyń múshesi Shyńǵys Qozbaqov 2 mıllıon teńge aýdarǵan.

Apattyń saldarynan temir joldaǵy qozǵalystar shektelip, keıbir jolaýshy poıyzdarynyń kidirýge májbúr bolǵany belgili. Soǵan baılanysty partıanyń Qyzylorda oblystyq fılıalynyń uıymdastyrýymen kidirgen 5 poıyzdaǵy 1200 jolaýshyǵa aýyz sý men ystyq tamaq tegin taratyldy. Sondaı-aq 15 jolaýshyǵa qajetti medısınalyq kómek kórsetildi.