QR Qorǵanys mınıstriniń orynbasary brıfıń berdi dep habarlaıdy Qamshy.kz aqparat agenttiginiń Arys qalasyna arnaıy barǵan tilshisi. 

Vıse-mınıstrdiń aıtýynsha, Arys qalasyndaǵy oq-dáriler men snarádtardy zalalsyzdandyrý áli bitpegen. Kemi eki úsh kún boıy Arys turǵyndary qalaǵa kirgizilmeýi múmkin.

Qorǵanys mınıstrliginiń kúshimen qala aýmaǵy boıynsha qorshaý jumystary uıymdastyryldy (QR QK jekequramynyń 800 adamy, 50-den astam áskerı tehnıka qoldanyldy).

Onyń ishinde 125 saper qala kóshelerinde, temirjol boıynda jáne áskerı bólimge irgeles aýmaqta tazalaýdy júzege asyryp jatyr. Ózge áriptesteri jeke quramdy barlyq qajettiliktermen qamtamasyz etýge jáne qala men áskerı qalashyqtyń aýmaǵyn qorshaýǵa qatysyp jatyr.

Aýada ushqyshsyz úsh apparat ushyrylyp, órt oshaqtaryn baqylaýǵa alyndy. Búgingi kúni 3 ot orny anyqtaldy. Desek te, iri jarylys oryn almady. Degenmen, turaqty qaýipti jaǵdaı saqtaldy.

Qalada jáne irgeles aýmaqta radıasıalyq kórinis qalypty jaǵdaıda.

Jarylmaǵan snarádtardyń turǵyn úılerge túsýi - mına joıý jumysyn kúrdelendire túsýde. Mundaı úı-jaılarǵa saperlerdi jiberý prokýratýra, polısıa jáne jergilikti atqarýshy bılik organdary qyzmetkerleriniń ilesip júrýimen júzege asyrylady.

Arys qalasynyń 16 kóshesinen jarylmaǵan 70-ten astam snarád tabylǵan.